PB Acharya-i Seluophe Model Village semzüktsü

Dimapur, December 18 (TYO): December 18, 2017 nü Nagaland Governor, P.B.Acharya-i Dimapur district kübok Seluophe Model Village semzüktsü.
Seluophe yimtsüng ya Lok Sabha nung Member of Parliament, Neiphiu Rio-i Sansad Adarsh Gram Yojana (SAGY) kübok Model Village ka ama adopt asü. Rio-i mezüng Mon district nung Longwa yimtsüng adopt asü aser iba sülen taküm Seluophe adopt süa liasü.
Selouphe nung tang tasen yangluba amphitheatre nung tongti tesemdanger ama o jembidang P.B.Acharya-i Prime Minister Modi-i jembiba olen ‘India ya yimtsüngtem asoshi lir aser yimtsüngtem merenlok tashi India merenloktsü, ta nenshia metetdaktsü.
Iba alizüng yur Modi-i 2014 küm SAGY tenzük. MP Rio-i Nagaland nung SAGY kübok yimtsüng ana adopt asüba atema kanga pelar aser Nagaland nungi MP ana den MLA temi küm 5 nung yimtsüng pungu danga adopt süra Nagaland kanga renloktsü, ta PB Acharya-isa ashi.
Nagaland ya pei sasa noktakteta otetba state ka akümtsü atema nübortemi tera tali meranga inyaktsü nüngdaker. Tsüngremi Nagaland nem ali rongsen jenti moaja lir aser iba ajanga takar state ka akümtsü ana nung dang lir, ta paisa ayongzük.
Selouphe yimertem dang paisa model village ka ama alitsü aser tejakleni aotsü ayongzük.
Iba sentong nung Governor PB Acharya-i MP Lok Sabha indang fund nungi Zuneboto aser Longleng district tem alitsüba ambulance gari sapitem agütsü. Paisa Seluophe yimtsüng indang report sayatsü.
Maneni MP fund nungi ENPO Dimapur aser ENPO Kohima nem ambulance ka ka agütsütsü.
Seluophe Model Village semzükba sentong nung chief host ji Neiphiu Rio liasü aser pai o jembidang Modi-i yimtsüngtem renlokdaktsütsü atema inyakba alizüng nenshia metetdaktsü.
Iba mapatong asoshi nodal department ji Rural Development department lir, ta paisa ashi.
Governor Acharya-i SAGY village tenzüktsüba atema pelaba ashidang, iba scheme kübok MP fund nungi guest house, amphitheatre, playground, furniture unit, weaving unit, Fishery ponds, rostrum, link, approach road, table saw mill unit amala mapatem inyaker ta ashi.
Yimtsüngtem renloktsü atema sorkar nungi teyari nüngdaker aser yimdaklirtemia infrastructure tem jungjunga anepalutsü tim, ta Rio-isa ashi.
Sentong nung mendenji Dimapur Deputy Commissioner, Sushil Kumar Patel liasü, United Christian church Selouphe village pastor, Vikesel Neikha-i temoatsü meshia sarasadem aser Chairman Selouphe village-i tesentepertem pela agizük.
Sentong nungsa Women Krotho Selouphe-i ken ka aten aser DRDA Dimapur Alemla Chishi-i anküp tepela o jembi.