PB Acharya-i skill development aser entrepreneurship ajungkettsü ayongzük

Kohima, October 6 (TYO): Nagaland angh PB Acharya-i university temji skill development aser entrepreneurship indang centre tem asütsüla ta tanü metetdaktsü.
“Shisaliok rejutem aser University tem ya kaket shisatsü angazükdak dang masütsüla saka skill development sayutsüla aser lanurtem entrepreneurship nung ajemoktsü atema tayongzükba agütsütsüla” ta Acharya-isa ashi.
NEILIT Meriema nung Career and Placement Cell, Department of English Nagaland University-i ayongzükba “skill development and entrepreneurship” training nung jembidang Angh-i iba onük jembi.
Nagaland aser North East tesem nung ali rongsen aika moaja lir aser itemji ano mebushiteti lir, ta paisa shisem.
Northeast tesem nung mapa manguba aser industry tem merenlokba ajanga lanur tazüngertemi tanga state tem nung oa inyaktsü atema aoer. Tazüngertmji meyipa arur pei pei state tem ajungkettsü atema maongka agütsütsüla, ta Angh Acharya-isa ashi.
“University temi skill development tesayuba agütsütsüla, kechiyong iba ya ajanga lanuputui ali rongsentem timi ketdangsüa amshitettsü. Degree tem anguba jagi shisatsü renloker saka mapa inyaktsüba indang tesayuba mangur, anungji skill development ya kanga tongti süa sayutsüla” ta paisa ayongzük.
Iba sentong nung technical session mapang District Project Officer for Land Resources Department Kohima, Dr M Tseikha-i ‘coffee & rubber plantation ajanga rongsenkettsüng ajungketba’ aser Head of Department of Animal Production Management, SASRD NU Medziphema, Dr Catherine Rutsa-i ‘shiruru metsüba’ indang onüktem jembi.
Iba shisatokden sentong nung Nagaland University nungi kaketshir 200 dak tema aden. Sentong nung mendenji Head of Department for English and Career & Placement Cell in Charge, Dr Rosemary Dzüvichü liasü aser Associate Prof. Department of English NU Meriema Campus, Dr Jano Sekhose-i anküp tepela o jembi.
Nagaland University nung Pro-Vice Chancellor, Prof R C Gupta-ia o jembidang, azüngtsü-zülutsü shia metetba lanurtem ya skill development aser entrepreneurship ajanga tajungba shimtettsüla, ta ashi.