PB Acharya-i tasüba temerenshi agütsütsü indang shidi sorkar dangi aben

Dimapur, Rongchii (April) 16 (TYO): Nagaland nung tanur dak tashiyim agi shi nung medemertem nem tasüba temerenshi agütsütsü atema Confederation of Women Entrepreneurs of India nung Chairperson cum National President, Smti Uma Ghurka-i temepishiba ka Nagaland Governor PB Acharya nem agütsü.
Governor Acharya-i iba shidiji pusema nungiter aser Chief Minister’s Office dangi benogo, ta PRO to Governor sangdong ka nung metetdaktsü.
Asenoki tetsür tanurtem kümzüka ayutsü atema mapa inyaktsü. Teinyaktsü aika aliba rongnungi aibelenertem ozüng tesashi agi merenshibaji kanga tongtipang ta Confederation-ibo bilemer, ta shidi shia lir.
Tetsür tanur dak tashiyim agi shi nung medemertem nem tasüba temerenshi agütsütsü mesüra taküm piyong tepuokdak ayutsü atema Confederation of Women Entrepreneurs of India-i temepishiba ka agütsür aser iba ama ken o atema ita trok tsüngda temeten agütsütsüla ta parnokisa shisem.
Iba temepishiba shidi ya nisungtemi pelaa agizüker aser ita ka tsüngda nisung 15,000 dak temai pusema sign süogo aser aikati sign südar. Maneni tetsür telok 15-i iba temepishiba pusema nungitba metetdaktsüogo, ta shidi nungsa shia lir.
Governor Acharya-i Mumbai nung Smti Uma Ghurka den ajurutep aser iba dak sendakba atema olemtepba sülen pai Uma dang pa indang office-ia shidiji yoktsü ashi, ta PRO-isa metetdaktsü.
Arishi küm 12 teküpok tanur dak shi nung medemertem nem tasüba temerenshi agütsütsü atema Rajasthan, Madhya Pradesh, Haryana aser Arunachal Pradesh state tem nungbo ozüng yangluogo.