PB Acharya-i tzünglu tzü tenzüka ayutsü ayongzüker

Dimapur, Rongchii (April) 13 (TYO): Nagaland Governor, PB Acharya-i tzünglu tzü tenzüka ayutsü atema ayongzük aser iba atema Kohima jila nung alirtem ajungmesoa 1000 litre water tank (sintex) ka nung 50% subsidy agi agütsütsü ta metetdaktsü.
50% subsidy ji mezüng tenüng agütsür nisung 20 nem agütsütsü, ta pai ashi.
Raj Bhavan-i water tanks ji alitsü aser tenüng agütsürtemi kidang mesüra office nung ibaji ayutsü atema yangluba sülen agütsütsü, ta PB Acharya-isa shisem.
Tzünglu tzü tenzüka ayutsübaji kanga nüngdak aser eco friendly rainwater harvesting system ka yanglutsübaji tasak masü mesüra mapang-a magitsü, saka iba ajanga tajangzük tulu agütsür, ta paisa metetdaktsü.
Rongchii (April) 12, 2018 nü Governor-i iba onük ya Nagaland Chief Minister den Raj Bhavan, Kohima nung lemsatepa liasü.
Pa lenisüba kübok Raj Bhavan 1.5 lakhs litres indang water harvesting reservoir ka teyangluzüker lir ta Acharya-isa ashi.
Raj Bhavan nung tesem balala nung tzünglu tzü tenzüka ayutsü atema water tank tem yua lir. Nagaland nung ita trok mesüra tali tzünglu arur aser tzünglu tzü tenzüka ayuba ajanga nübortemi tajangzük tulu angutsü, ta paisa shisem.
Subsidy aginürtemi Governor’s Secretariat, Raj Bhavan Kohima nung tenüng agütsütsü akok aser office mapang (0370) 2245789 den osang tejangja metetpelatsü akok.
Yashi Chief Minister den senden amendang Governor Acharya-i Gayatri Project Limited nungi teshimtet nübotem den senden amenba osang lemsatep aser Kohima-Dimapur highway nung 4 lane mapa mapang shitak nung tembanga inyaktsü atema ashi.
Mapang talila agia inyakba ajanga nübortem timtem majurudaktsütsüla aser iba dak sendakba progress report hopta shia pa indang office nem agüjang ta Governor-isa Chief Minister dang ashi.