PDA sorkar chireptsü anogotem züngdangteta lir: TR Zeliang

Wokha/Mokokchung, Monupii (May) 17, 2018: Taruba Lok Sabha bye-elections dak sendakba nüboyim sentongtem nung NPF Legislature Party lenir, TR Zeliang-i NPF candidate, C. Apok Jamir atema nübo yimja jembiba noksa nung angur. 

Wokha/Mokokchung, Monupii (May) 17 (TYO): NPF Legislature Party lenir, TR Zeliang-i PDA sorkari ita ana tsüngda parnoki nangzükba ama masü anemsü yimya nung inyakogo ta sashia aitsü, ta tanü Information & Publicity Wing, Office of the Leader of Opposition, Nagaland-i sangdong ka nung metetdaktsü.
“PDA sorkar anogotem züngdangteta dang lir aser sorkarji pasasa chireptsü,” ta paisa ashi.
Wokha jila aser Mokokchung district kübok Longmisa yimdak taruba Lok Sabha bye-elections dak sendakba nüboyim sentongtem nung jembidang TR Zeliang-i, PDA sorkari ochishia aser junga inyaktsü ta nangzükba tu ita ana tsüngda jangja-jangja nguogo, ta ashi.
Tim masüba lenmang ajanga VIP tem shimmer; VIP sobaliba anema benoka inyaktsü nangzükbaji o dang kümogo, kechiyong PDA sorkari state senpong nung sen aika indokba den külemi tim masüba lenmang ajanga aika shimogo, ta paisa ashi.
Tawa Karnataka Assembly elections agiba dak sendakba nung NPF Legislature Party lenirisa, India nung state balala nung linük temzüng balala benshir, ta aitsü.
Iba dak sendakba nung paisa, “Yimtenren party ka ajangzüktsü atema linük temzüng parnok sünütsü süa amshitsü asü?,” ta asüngdang.
Pai ashiba agi, tawa Nagaland Assembly election nung NPF-i menden 26 nung takok ngua ‘single largest party’ liasü, ajisüaka Karnataka nungbo sorkar akumtsü atema single largest party nung ajemdaker BS Yeddyurappa leniba nung BJP nem maongka agütsü.
“Süra kechiba Nagaland nungbo NPF-i aniba sorkar nem temelaba magütsü?” ta pai asüngdang.
Taoba Chief Minister, TR Zeliang-isa Naga nunger dang by election nung NPF candidate, C. Apok Jamir nem vote agüjang, aser ibaji ajanga Naga nunger atema ola adoka nokdaker party ji NPF Party kija lir ta sayuang, ta mepishia metetdaktsü.
“Asenoki alima dang, Naga nunger atema ola adoka nokdakerji NPF Party lir ta sayuang,” ta paisa ashi.
Lok Sabha nung züngsemji regional party ka nungi asütsüji kanga tongtibang, kechiyong ibaji ajanga shinga tashi kübok meinyaktsü saka state aser nüburtem atema inyaktsü, ta Opposition Lenir, Zeliang-isa metetdaktsü.
“Rajya Sabha nung taoba MP (1998-2004) aser state nung anaben MLA inyaker, Apok Jamir-i aika ajangshia inyakogo, anungji Lok Sabha nung züngsem asütsü atema pa shima Parliament-i yokba ajanga Naga nunger kanga ajangzüktsü,” ta paisa ashi.
“Taoba mapangtem ama masü saka taruba Parliamentary Elections yabo kanga tongtibangsüa züngshitsüla aser asenoki C. Apok Jamir shimtsüla, kechiyong pai Parliament nung Naga nunger ajak atema inyaktsütsü,” ta paisa shisem.
PDA sorkar indang yimyim ‘Temelenshi arudar’ aija TR Zeliang-i, “Chichiba temelenshiji tema nungi masü saka telunglen nungi adoktsüla. Ibaji temalen nungi masü saka tsünglanglen nungi tenzüktsüla,” ta ashi.
Longmisa yimdak ayongzükba sentong nung jembidang NPF Working President, Huska Yepthomi-i, Rio-i pai Naga nunger ajak atema inyaktsü ta nangzüker Lok Sabha-i aoba ajanga Naga nunger ajak ashioktsü, kechiyong pai Parliament nung working days shilem 10 nunga maden, ta metetdaktsü.
“Pai (Rio) Naga nunger atema Parliament nung kechi onüksa benoka jembi?,” ta paisa asüngdang.
Maneni Rogonü (Hokolbar) NPF campaign Team-i Mokokchung aser Tuensang District kübok tesem balala semdangtsü.