PDA sorkar melongjemteter

– Among P. Aier

Nagaland nung Peoples Democratic Alliance (PDA) ta ser sorkar tasen ka kümtetaka, iba  teloktep nung züngsemtem nemnemtepba aser temulung mechitepba osang angashir. Kanga dang mera keta aser yimya balaka nung PDA sorkar kümtetba sentong agia liasü aser cabinet senden mezüng amendang parnoki telemtetba aika agia osang sangoktsü. Chief Minister tasen Neiphiu Rio-i Nagaland nung VIP libaliro aser inyaksangshi agientsü ta tenangzükba agia mezüng anogo nung garitem nung designation/name plates mamshitsü tetuyuba agütsüba den nübortem tsüngdang tenangzükba aika agi aser iba jagi Nagaland nung alirtemi atangji iba sorkar yagi Nagaland nung temelenshi tajung bener arutsü akok ta bilem. Ajisüaka, tesüiba anogo ka ana tsüngda osang angashiba ajangabo Nagaland nung PDA sorkar tasen ya anojungi chireptsü ama ang tsüremseta bilemtsüsa mapang ka bentsür aruogo. Taküm 13 buba Nagaland Legislative Assembly indang election nung National Progressive Democratic Party (NDPP) aser Bharatiya Janata Party (BJP) tsüngda menden lemsar toktep aser NDPP-i menden 18 nung aser külen BJP-i menden 12 nung takok ngutet saka iba teloktep ajanga sorkar akümtsü menden peria mongutetba agi JD(U) nungi MLA ka den Independent MLA ka anioker sorkar tasen aküm. Iba teloktep dang People’s Democratic Alliance (PDA) ajatsü ta sür sorkar kümtet saka tang parnok teloktep sasep nung nemnemtepba aser temulung mechitepba osang lir. Hao, Budget Session tenzüktsü ghonda ishika dang anünga lia Nagaland Chief Minister-i par cabinet minister tem nem mapabo lemzüktsütetogo saka iba jagi tang parnok sasep nung adoka aliba khuret mokoktettsü südi ta bilemer. Nagaland nung sorkar tasen tentetaka yimtenren tensa mesüngjemtetba ajanga state yimtiba Kohima nung aliba Hotel ana nung NDPP aser Naga People’s Front (NPF) MLA tem anidena lir ta osang angazüker. MLA temi pei pei party akoksatsüsa telemtetba magidaktsütsü aser telok ka toktsür ka nung oa medendaktsütsü atema parnoki iba mapa ya inyaker ta osang angazüker. Taküm election nung NPF-i menden teimba nung takok angu saka parnoki menden 31 nüngdakba metongtet, ajisüaka parnok den MLA 5 dang oa denra sorkar akümtsü tashi angutsü. NDPP ya ECI-i recognized asüba political party ka masü anungji parnok Linük Temzüng nung Tenth Schedule kübok maiter. Iba ozüng ajanga MLA temi party ka toktsür ka nung oa adentsü noktanger. PDA sorkar nung NDPP MLA teimba lir saka parnoki cabinet menden 12 nungi pezü dang anguba aser BJP-ibo deputy chief minister menden dena cabinet menden 6 tashi anguba atema NDPP MLA tem kar mepelaba osang angashir. Ano külen, BJP central lennirtemi Nagaland nung party MLA kar toktsür tanga party nungi parnok den arua adenertem nem ang maongka agütsüba ajanga BJP MLA kar mepelaba osang angazüker. Anungji, tang Nagaland nung kümteta aliba sorkar tasen ya tashi tait sorkar ka masü saka melamela loksaa aotsü tia nung aliba sorkar ka ang lir ta asenoki shiteter. Anungji, PDA teloktep nung züngsema aliba MLA temi pei ajungtsü atema masü saka Nagaland state ajungtsü atema bilema parnok tsüngda angatettep nung dang iba khuret koktettsü aser sorkar tashi aittsü ta bilemer. Ajak dang tongtipangbaji, NDPP-BJP-i election mapang nübo ayimdang ‘Temelenshi Arudar’ ta nübortem dang sangoktsüba ama tamasa MLA temi sorkar inyaksangshi nung temelenshiji bener arua sayutsüla.