PDA sorkar tashi itta lir aser state tejakleni anitsü: Neiba Kronu

Phek, April 1 (TYO): Nationalist Democratic Progressive Party (NDPP)-i aniba People’s Democratic Alliance (PDA) sorkar tashi itta lir aser onoki state tejakleni anitsü, ta Planning & Coordination and Land Revenue Minister, Neiba Kronu-i ashi.
“Taoba Naga People’s Front (NPF)-i aniba sorkar nung adenba atema sasa bilemer. Lenisüba menden raktepba ajanga NPF sorkari terenlok kecha bener maru. Chief Minister Neiphiu Rio aser Deputy Chief Minister Y Patton lenisüba kübok PDA nung züngsema alirtem ajak longjema lir” ta Kronu-isa ashi.
Tanü Phek district kübok tesem asem- Chetheba, Sekrezu aser Phek nung PDA consensus candidate aser NDPP nominee Tokheho Yepthomi atema votes yimtsüba mapang Kronu-i NPF aitsü.
PDA sorkar akümba sülen NPF-i NDPP MLA tem Election Commission-i derecognized asütsü ta tiyazü shia nübortem anisatsü merang, ta pai ashi.
PDA teloktep sorkar tashi itta lir aser kümsük tembanga intaktsü. NPF ya mashii mapang ka nung loksa aotsü aser Lok Sabha election atema candidate ka danga meshimtet, ta Kronu-isa shisem.
NPF-i temeli ana tener o jembir, kechiyong NDPP-i BJP posemba atema parnoki aitsür saka külen Manipur nungbo parnoki BJP-i aniba sorkar den yariteper, ta paisa aitsü.
Citizenship Amendment Bill (CAB) 2016 indang olen ka jembidang “Naga nungerbo CAB nungi kümzüka lira ka North East ajungai iba bill anema noktaker aser iba nung Nagaland sorkaria posema nungiter” ta Kronu-i ashi.
Naga yimten tekaratiba nung latettsü atema PDA sorkar mapa inyaker aser India sorkar o Naga yimten teloktem tsüngda olemtep tatembangleni arudar. Telemtetba tajung ka agitsü atema Naga nunger ajak longjemtsüla, ta paisa ashi.
Lok Sabha election nung regional candidate ji Tokheho Yepthomi dang lir anungji pa nem vote agütsütsü mepishir, ta Kronu-isa ayongzük.
Tanü agiba sentongtem nung NDPP working president Nuzota Swuro, BJP Nagaland ex-Servicemen Cell convener Vekho Swuro, NDPP lennirtem- Kupota Khesoh, Dr K Hoshi aser Kudecho Khamo, Ex-MLA Khuosatho, BJP Phek district president Niicutso Ruho aser NDPP Phek Region president Mosonyi Domeh nungertemia o jembi.