PDA sorkari angati WiFi hotspots agütsütsü

Kohima, Rongchii (April) 14 (TYO): Nagaland sorkari state yimtiba Kohima aser Deputy Commissioner indang office ajak nung WiFi hotspots agütsütsü.
Nagaland Innovation Expo 2018 nung Information Technology, Science and Technology and New and Renewable Energy Advisor, MLA Mmhonlumo Kikon-i iba osang metetdaktsü.
Iba expo ya Kohima Science College, Students Union Jotsoma (KCSUJ)-i ayongzüker aser Department of Science and Technology o Department of Higher Education, Government of Nagaland-ia teyari agütsür.
Nagaland nung NDPP-i aniba PDA sorkari iba telemtetba ya yashi agi ta Mmhonlumo-isa ashi.
Nüngdakba osettem amenokba sülen Kohima Science College (Autonomous), Jotsoma, Nagaland University indang campus asem- Lumami, Kohima aser Medziphema aser DC office ajak nung angati WiFi hotspots agütsütsü, ta paisa shisem.
Nagaland Innovation Expo ayonga agiba atema Mmhonlumo-i tenüngsang agütsü aser iba nung sorkari akokba tashi yariteptsü ta paisa shisem.
Nagaland Innovation Expo ya kümshia ayonga agitsü atema sorkari yariteptsü, ta paisa metetdaktsü.
Expo tenzükba sentong nung Asst. Prof. Wenyitso Kapfo menden liasü, Kohima Science College (Autonomous) Jotsoma principal Dr. Lily Sema-i tesentepertem pela agizük, KSCSUJ Science Club Secretary Keyileurangbe Thou-i expo indang osang metetdaktsü aser KSCSUJ general secretary K. Puthenhenmei Loachy-i anküp tepela o jembi.