PDA sorkari CAB anema yangluba resolution agizük

Kohima, February 25 (TYO): Opposition MLA 26-i senden nung medeni kimai luaka tanü People’s Democratic Alliance (PDA)-i Citizenship Amendment Bill (CAB) 2016 magizüker ta renemba Government resolution agizük.
Honibarnü Nagaland Chief Minister Neiphiu Rio-i iba bangzüng benok aser anogo ananü tashi MLA 14 (ruling aser opposition nungi tenetnet)-i iba atema olemtep.
Anogo ana tashi olemtepa arudang Opposition züngsemtemi CAB 2016 magizüker ta lemtetba posema nungit saka parnoki onük pungu bangzüng nungi Arrla 371(A) dak sendakba onük ana agiena liasü.
Chief Minister Neiphiu Rio-i Assembly Resolution ta tenüng melentsü agizük, ajisüaka Linük Temzüng nung Arrla 371(A) dak sendakba onüktem magientsü ta tekong meranga noktak.
“Arrla 371(A) ya Naga nunger atema khenyong balaka lir aser asenoki iba ya medeni ora, asenok tekümzüktsü kecha malitsü. Iba ya medeni asenoki CAB anema menokdakttettsü aser India sorkari CAB benoktsü” ta Rio-i ashi.
January 31 nü Dimapur nung senden amendang Naga nunger 43 den kin teloktem aser civil society tem aser Congress o NPF dang medeni political party ajaki aginüba ama iba bangzüng ya renemba lir, ta paisa shisem.
NLA Deputy Speaker Zhaleo Rio-i iba resolution agizüktsü atema vote agiba mapang lapoktsü saka idangji Opposition lennir TR Zeliang-i parnoki tang yanglua aliba resolution posema menungittsü aser agizüktsü süra PDA government resolution ta ser dang agizükang ta ashi.
Iba sülen Opposition MLA 26 prongla senden nung medeni kimai luadok aser tanüngba MLA temi voice vote ajanga resolution agizük.

You must be logged in to post a comment Login