PDA sorkari CAB magizüker

Dimapur, January 28 (TYO): Citizenship Amendment Bill (CAB) ya Nagaland aser Northeast nung alirtem atema tebilemtsü ka lir aser Nagaland nung nisungtemia yimya balala agi CAB magizükba sayuogo. Iba tebilemtsü angateta State Cabinet-i January 28, 2018 nü Chief Minister indang Residential Office nung senden ka amen.
State sorkar ya Nagaland nung alirtem taginüba aser mulungba inyaktsütsü atema lir aser iba jagi sorkari CAB anemer aser magizüker ta tanü cabinet senden nung bangjem.
Nagaland ya Arrla 371 (A) aser ILP inyakyim ajanga kümzüka lir ta PDA sorkari State Cabinet ajanga metetdaktsüogo aser Parliament nung agizüka Citizenship Amendment Bill ajanga nisung kati India senso aküm nunga, pa/la Nagaland nung alitsü mesüra rongsen angutsü asoshi temeten mangutsü, ta cabinet-isa ashi.
Nagaland sorkari tetenzük nungi India sorkar dang CAB magizüker ta metetdaktsüogo. State Cabinet-isa January 7, 2019 nü India sorkar dang Parliament nung CAB mebenokdang khen junga reprangshimang ta mepishi. Maneni, January 18, 2019 nü State Cabinet senden ka nung Nagaland Arrla 371 (A) agi kümzüka lir ta bangjemshi aser Chief Minister-i Union Home Minister dang iba telemtetba osang metetdaktsü aser India sorkar dang Northeast kübok state ajak den lisopurtem temetentem kümzüka ayutsü atema olemteptsü mepishi.
State Cabinet-isa January 7, 2019 nü kin hoho, NGOs, civil society, political party, lennirtem aser sendaktepa alir ajak den CAB atema senden ka amentsü telemtetba agi. Iba telemtetba ya January 19, 2019 senden nunga bangjemshi aser Article 371 (A) atema Nagaland Legislative Assembly indang Standing Committee dangi iba onük abentsü lemtet.
Nagaland nung alirtem dang nübortem temetentem aser maongkatem kümzüka ayutsü atema mapa inyaktsü ta PDA sorkarisa nangzükba cabinet-i nenshia metetdaktsü.
India sorkar, NSCN aser NNPGs tsüngda yimjung olemtepba nung tang ya kanga dang tongtipang mapang ka lir. Iba jagi iba olemtep nung tetsükdaktsü aludaktsütsüsa state sorkari mapa kecha meinyaktsü aser telemtetba kecha magitsü, ta State Cabinet-i shisem.