PDA sorkari CAB magizüker ta lemtetbaji shitak asü?: NPF

Dimapur, January 29 (TYO): PDA sorkari taoba mapang Cabinet-i Citizenship Amendment Bill 2016 anema menokdaktsü ta telemtetba agiba sülen tang ano magizüker ta lemtetbaji temenünütsüka lir ta Naga People’s Front (NPF)-i ashi.
PDA sorkari nübortem ola angashiba atema pelar saka ano parnoki kanga dang aoksa telemtetba agiba nung langka ka meshitak lir ta sayur, kechiyong anogo ishika tejaklen parnoki Bill anema menokdaktsü ta telemtetba ka agia liasü, ta NPF-isa ashi.
NDPP aser parnok den yaritepba teloktemi CAB anema menokdaktsü ta BJP Central lennir dang ashiba aser Chief Minister, Neiphiu Rio-i June 12, 2018 nü yimjak nung CAB posemba metetdaktsüogo. Anungji, tang PDA sorkari Bill magizüktsü lemtetbaji shitakba asü khen atema Naga nunger temulung anisüngzükdaktsütsü atema lir ta asüngdanger, ta Press Bureau, Naga People’s Front, Central Headquarter sangdong ka nung ashi.
PDA sorkari Bill magizüktsü lemtetba atema tenüngsang agütsür saka ano parnoki tarutsü nung iba telemtetba meyipa agitsü asü ta ratar, kechiyong PDA sorkari January 7, 2019 nü cabinet senden nung Centre dang CAB meyipa reprangshiang ta ashitsü lemtet aser ano kin hoho, civil society tem, NGOs, political party tem aser sendaktepa alirtem den shisalemsatepba senden ka amentsü ayongzüktsü lemtet, ta NPF-isa metetdaktsü.
Naga nunger ajaki CAB magizüker anungji PDA sorkari shisalemsatepba sendenji mayong nunga kecha masü. Republic Day nü sorkar ketdangser kar dak alaka public madenba ajanga PDA sorkari Naga nungertemi Bill magizüker ta asüba telangzüba angutsüla.
Arrla 371 (A) aser ILP ajanga Naga nunger CAB nungi kümzüka lir ta PDA-i shijen shiyonga arur saka public-i CAB anema mapa inyakba ngua PDA cabinet-i telemtetba agishibaji Naga nunger ashioktsüba ama lir. Koma’r ka süaka, iba telemtetba ajanga Arrla 371 (A) aser ILP-i Citizenship Amendment Bill menokdangtsütsü ta asüba sayur.
Cabinet-i Bill magizüktsü lemtetogo saka parnok Lok Sabha MP, Tokheho Yepthomi-ibo January 8, 2019 nü Bill posema vote agüja lir, anungji pai iba vote ji meyipa agitsüla. Aji ta mesüra, Naga yimten puitotsü nung iba ya nübortem ashioktsüba mapa tulutiba ta züngshitsü, ta
NPF nungi Rajya Sabha MP-ibo Bill anema vote agütsütsü. Anungji PDA sorkaria lemtetba ama aser Naga loktiliba ajungkettsü atema inyaktsü imlar, ta NPF-isa metetdaktsü.