PDA sorkari MNREGA sen tim mesüi amshir: NPF

Dimapur, Rongchii (April) 12 (TYO): Taoba Chief Minister, TR Zeliang lenisüba kübok NPF-i aniba DAN sorkari India sorkar dang nungi MNREGA kübok sen crore 285 meshizük saka Election Model Code of Conduct aliba ajanga senji Village Development Boards nem magütsütet. Ajisüaka, tang Chief Minister, Neiphiu Rio-i aniba PDA sorkari Central Fund tim mesüi amshir, ta Press Bureau, NPF sangdong ka nung metetdaktsü.
PDA sorkari VDBs nem sen lema agütsütsü melena sen aika katizüka ayur aser ano RD nung Principal Secretary-i pai aginüba ama MNREGA mapa inyaker aser iba jagi department aser VDBs timtem ajurur, ta NPF-i ashi.
Sen crore 285 nungi PDA sorkari sen tawa tu VDBs nem sen crore 140 agütsüogo. Tang agütsüba nungji Dimapur District nem Rs. 13,24,11,351 lemzüktsü aser iba nung VDB, Nagarjan (Kuda) Village nem Rs. 10,73,800 lemzüktsü. Ajisüaka, Principal Secretary-i Nagarjan (Kuda) Village nem ano Rs. 1, 45,00,000 talila agütsü aser parnokbo Rs. 1, 55,71,800 tashi lemzüktsüogo, ta NPF-isa ashi.
“Kechiba Principal Secretary, RD-i yimtsüng ka nem sen paika lemzüktsür? Yimtsüng ka nem yamaji lemzüktsüra Dimapur District kübok yimtsüng 200 dak temai kechi tia ajurutsü? Iba ajanga PDA sorkari tejak repranga aser ochimeshi inyakba jungkai adoka sayur,” ta NPF-isa metetdaktsü.