PDA sorkari nangzükba ama meinyaker ; Kobi melii state sorkar chireptsü: NPF

Kohima, Monupii (May) 2 (TYO): People’s Democratic Alliance (PDA) sorkar kümteter anogo 56 süia aruaka parnoki Nagaland nung temelenshi bener arutsü ta nangzükba tenük agi kecha mangur, ta opposition Naga Peoples’ Front (NPF)-i tanü ashi.
PDA sorkari Metsüremi (March) 8 nü sorkar kümtetdang, taruba anogo 100 aser 200 tsüngda schema balala ajanga temelenshi bener arutsü ta nangzük. Parnokisa anogo 60 tsüngda district headquarter ajak nung gari lenmangtem yanglutsü ta nangzük. Ajisüaka, anogo 56 süiaka gari lenmang tsütsü temelenshi kecha mangur, ta NPF otongdar, Achumbemo Kikon-i Rasemnü (Bodbar) osangbener den jembidang ashi.
PDA sorkari nübortem ashioktsür, kechiyong parnok den yaritepba teloktem nungi MLA tem advisor meshim saka parnok den yaritepba teloktem nung party lennir 13 tashi Cabinet Minister aser Minister of State jenjang nung shim, ta paisa ashi.
“MLA tem peria liaka, kechiba party mapa inyakertem yamai shimer? Item mendentem nung shimokba ajanga state senpong asoshi timtem ang tali bener arutsütsü” ta Kikon-isa shisem.
Election Commission of India (ECI)-i Nagaland nung Lok Sabha by-election agitsü indang osang metetdaktsüba sülen Model Code of Conduct tenzükogo, saka PDA sorkar iba ozüng alema yashi ang nisungtem mapa nung shimokogo. Anungji, ECI-i PDA sorkar nem tapet temerenshi agüjang ta NPF-i akhanger, ta paisa metetdaktsü.
Rongchii (April) 22 nü Tuensang district nung totzü gari abenba driver aser handyman na pur aoba ajanga tawa state ajunga nung petrol pump tem shibangba ajanga PDA sorkari law & order tensa mazüoktetba jungkai adoka sayur, ta NPF otongdarisa ashi.
PDA sorkari VIP sobaliba agientsü atema lemtet saka parnoki state nung sensotem kümzüka ayutsübabo amadokogo, ta paisa shisem.
PDA sorkarisa Nagaland nung Mini Hornbill festival ta ser kin shia benjung amungtsü lemtetba ajanga kintem indang benjung tamaitsü samadoktsü. Hornbill festival ya tenzüker talang ka masü saka kin balala indang benjungtem yabo akhidang nungi munga aruba lir, anungji Hornbill festival den memeyokteptsüla, ta NPF otongdarisa metetdaktsü.
Züngsem 60 agi akümba State Assembly nung NPF party nungi MLA 26 lir aser State Assembly indang putiotsü nübo teimtiba aliba Opposition party lir. Onoki maneni Opposition tajung ka ama shilem agitsü. Onoki Naga nunger taginübatem atema maneni ola adoktsü aser Naga nunger ajungtsü aser maitsü atema raratsü, ta Kikon-isa ashi.
NDPP-i aniba PDA sorkar nung timtem lir aser parnok mashi mapang ka nung apu tejen ka ama chireptsü. Naga nungertemi NPF Party meimer aser onoki Naga nunger tebilemtsütem aser Naga yimten tebilemtsü atema khuret bena inyaktsü renema lir, ta paisa shisem.
Taoba küm pezü tashi T R Zeliang aser Dr Shurhozelie Liezietsu nati Chief Minister inyakdang budget deficit alibaji taoba Chief Minister Neiphiu Rio dang nungi lemzükba budget deficit den medemdangra ishika dang lir, ta Achumbemo Kikon-isa metetdaktsü.
Monupii (May) 28 nü Lok Sabha bye-election agitsü sentong ya Rio-i atongba lir. Pai Naga yimten tebilemtsü tekaraba nung latettsü atema ta nangzüker Monupii (May) 2014 nung Delhi-i ao saka iba olemtep kanga dang tongtipang mapa ka nung alidang aser tatembang küma melatetdang pai Lok Sabha nungi anen, ta Kikon-i Rio dak tai tongloktsü.
NPF MLA temi gari tajungtem meshiba atema Kikon-isa ashiba agi, “MLA tem ji Kohima mesüra Dimapur nung dang masü saka meta talang pilar alirtem dangia aoer. Taoba mapang gari alitsü ta shidangba dang nungi Toyota Innova anepalutsü dalangba lir.”
Sorkari Heads of Departments nem agütsüba garitem reprangtsüla kechiyong parnoki nüngdakba dang nungi tasakba agütsür, ta Kikon-isa shisem.