PDA sorkari o agi dang temelenshi bener arur: TR Zeliang

Zunheboto, Monupii/May 23 (TYO): Tanü Zunheboto jila nung lokti senden ka nung jembidang NPF Legislature Party lenir, TR Zeliang-i, PDA sorkari mapa agi masü saka o agi dang temelenshi bener arur, ta aitsü.
13buba Legislative Assembly mapang pai Students Insurance Scheme benokba dak sendakba nung tan aliba sorkar nungi telangzüba mangu, ta shia Zeliang-i, Insurance Scheme ji Central-i Sponsor asüba Scheme asü State funded Scheme, ta asüngdang.
Tang aliba Chief Minister, Neiphiu Rio-i NPF party nung telemsa adokdaktsütsü aser tashimeitdaktsütsü atema metsüh prok, ta aija Zeliang-i, Rio-i G. Kaito Aye CM candidate asütsü ama benok, aser ibaji ajanga tanen makai timtem adoka Nagaland nung alirtem nem timtem agutsü, ta aitsü.
“Ajisüaka tangbo Rio sorkar tashi nung lir asünung pai G. Kaito Aye sendoker tang shimba züngsem tasenpur nem dang Cabinet nung maongka agutsü,” ta paisa shisem.
Sumi nunger dang Rio indang asalentong tamajungtem mita alitsüla; Rio-i tashi aser rongsen arishiba yimtenren asaya nung tetemsü Sumi nunger lenirtem tenla agutsür, ta paisa ashi.
“Zunheboto jila terenlok atema sen crore 2.75 lemzüktsü, ajisüaka iba senji tangaleni meyipa tangbo jila atema sen mali,” ta pai ashi.
State nung senotsü timtem atema Rio aija Zeliang-i, “Atal Bihari Vajpayee sorkari senotsü agutsüba ajanga state sentsüh meshimeshia makai akum, ajisüaka Rio Chief minister küm 11 inyaker Delhi-i aoba tashi nungbo state sentsüh crore 1234 ka tashi akum,” ta metetdaktsü.
PDA sorkar ita ana dak sendakba nung NPF otongdar, Achumbemo Kikon-i Rio CM akumba sülen hopta ishika tsüngda Dimapur nung shishilembar ana tepsettsü merang, Nagaland nung oil tanker anisang aser handyman puer aoba anema longkak aita petrol pumps shibang aser College Students-i by election anema nokdak, ta aitsü.
Bye election nung NPF candidate, C Apok Jamir-i, taruba election ya tribe ana tsüngda tetoktepba ka masü saka tangatetba balala ana tsüngda tetoktepba ka lir, ta ashi.
Naga nunger dang ajungtsü atema, maitsü aser tamangba yimsü kümzüka ayutsü atema NPF nem vote agüjang ta mepishia Apok Jamir-i, Naga nunger ola chichibaji NPF lir, ta ashi.
Kasa sentong nung Yitachu-ia, “India sorkari asen ola angatsü atema nübo tetemsü Parliament-i shimer yokang. Asenok longjemer külemi inyaktsü atema tang mapang ya lir,” ta ashi.
Kasa sentong nung Vikheho Swu, Dr. Chumben Murry aser Huskha Yepthomi nungeria jembia liasü.
Iba sentong ya NPF Zunheboto Division Tir, Akavi Sumi leniba nung agi.