PDA sorkari temelenshi bener arutsü; Naga yimten latettsü: Minister Pangnyu

Kohima, Metsüremi (March) 10 (TYO): Chief Minister Neiphiu Rio lenisüba kübok People’s Democratic Alliance (PDA)-i Nagaland nung terenlok bener arutsü aser tejakleni anir aotsü ta Minister, S Pangnyu Phom-i ashi.
Taküm Assembly Election nung NDPP candidate aser taoba minister Dr Neikiesalie Nicky Kire-i takok anguba atema tenüngsang agütsüba sentong ka nung o jembidang pai iba osang metetdaktsü.
Pangnyu Phom-i Dr Nicky nem tenüngsang agütsü aser NDPP-BJP teloktepi sorkar akümtsüsa maongka agütsüba atema vote agütsürtem dang pelaba metetdaktsü.
Pangnyu ya BJP ticket amer takok angu aser paisa ashiba agi, iba sorkar kümsük mapang Naga yimten latettsü.
Pangnyu-isa Kohima nung alirtem dang tangartemi ajizüka benshitsüsa alitsü ayongzük. “Tangalen aliba Naga nungertemi state yimtiba nung alirtem sülen anidaker” ta pai ashi.
NDPP 9-Kohima Town Assembly Constituency MLA Dr Nicky-i nübortem dang pa council of minister nung medensemba atema tezü matangtsü aser mepelai malitsü ayongzük.
BJP ama NDPP-i election nung takok tajung mongutet aser iba jagi Chief Minister Neiphiu-i council of minister shimdang khuret tulu ajuru. Anungji asenoki iba khuretji angatettsüla, ta Dr Nicky-isa metetdaktsü.
“Onoki sorkar takang ka aginür aser iba jagi onok NDPP züngsemtemi bendanga agütsü. Sorkar kümteta aoba sülen taginübatem atongtsü” ta paisa shisem.
Iba sentong nung minister tasentem- Neiba Kronu, Metsubo Jamir aser Tongpang Ozukum nunger den MLA tem aika aden.
Sentongji D Khel Ground, Seikhazou, Kohima village nung agi aser Baptist Mission Church pastor, Rev Moa Longchari-i temoatsü meshia sarasadem.
Sentong nung mendenji Tseivilie Meachie-o liasü, Music Academy Kohima-i ken aten aser NDPP 9-Kohima Town A/C president Zotuo Kire-i anküp tepela o jembi.