PDA sorkari terenlok aser Naga yimtenren onük atema inyaktsü: Rio

Kohima, Metsüremi (March) 08 (TYO): Tanü Nagaland Chief Minister tasenba, Neiphiu Rio-i, par sorkari terenlok mapa inyaktsü aser Naga yimtenren onük tekaraba nung latettsü atema kanga meranga inyaktsü, ta metetdaktsü.
Tanü Kohima Local Ground nung sorkar tasen tenangzükba agiba sülen osangbenertem den jembidang Rio-i, “Onoki terenlok aginer aser Naga yimtenren onük tekaraba nung latettsü atema kanga meranga inyaktsü,” ta metetdaktsü.
Tanü Secretariat nung mezüngbuba cabinet senden amenba sülen osangbenertem den jembidang Rio-i, “Onok atema tongtibangtiba onükji Naga yimtenren onük lir aser iba atemaji onoki kanga yakyaka inyaktsü, nübur ajak longjemdaktsütsü merangtsü,” ta ashi.
“Ken o jembiba nung tanga teloktem dendaktsütsü atema PDA sorkari Naga Political Wing Affairs Committee tentettsü, kechiyong onoki iba onük ajaki akhümketa agizüktettsüsa tekaraba nung latetdaktsüner,” ta paisa ashi.
“Mapang agiaka onoki terenlok kaa inyakdar, aser onoki aritepa inyaka tensa angatetra tekaraba nung iba onük latettsü,” ta paisa ashi.
Taruba ita ishika tsüngda Naga yimtenren onük latettsü asü? ta asüngdangba langzüdang CM-i, “Ibaji kodang ataloktsüar shingaia ashitsü makok,” ta ashi.
NSCN(IM) aser NNPGs telok troki ken o jembidar, ta shia pai, tang ang pai menden tasen agizüker asünung, pai ibaji tejangja reprangshitsü aser iba nükjidong atongtsü atema lenmang lapoktsür ka ama inyaktsü, ta ashi.
NDPP nem cabinet menden ishika dang lemzüktsüba dak sendakba nung Rio-i, “Onok (NDPP) shilemji JD(U) aser Independent nem agutsü,” ta ashi.
“Onoki (NDPP) bilemba ama meinyaktet, kechiyong election nung onoki imlaba ama mangu. BJP-i kanga junga inyakogo. Parnoki imlaba dang nungi tajungba inyaktet, aser iba atemaji onoki pelar, anungji tang menden lemzüktsüba nungji onok atema kecha timtem mali,” ta paisa shisem.
NPP ji PDA den lir, ta pai jembiaka parnoki PDA nungitba nungi atsüngogo, ta jembiba dak sendakba nung Rio-i, Meghalaya CM Conrad Sangma tenangzükba agiba mapang nung State NPP Tiri onok nungitba metetdaktsü, saka mangatettep kar ajanga parnoki atsüngadok, ta metetdaktsü.
Ajisüaka tanü tenangzükba agiba sentong nung State Tir aser MLA tema lia Rio-i Conrad Sangma den jembiogo, aser parnoki PDA sorkar nungittsü ta shiogo, ta metetdaktsü; Ibaji ajanga PDA züngsem 34 akumtsü.
Nagaland nung Parliamentary Secretaries shima aruba ama shimtsü asü? ta asüngdangba langzüdang Rio-i, “Ozüng nung Parliamentary Secretaries malitsü atema jangjajangja shia lir,” ta ashi.
Delhi nung AAP sorkar atishia Rio-i, “Onoki ozüng alema inyaktsü tebilemba mali aser onoki Parliamentary Secretaries meshimtsü,” ta metetdaktsü.
Tenangzükba agiba sentong nung taoba CM, TR Zeliang adenba dak sendakba nung Rio-i, “Pa anenaka ni asoshi paji kü tembar lir, yamaji tangar atema-a tembar, tsükchir ka masü,” ta langzü.
Rio-isa, council of ministers atema portfolio ji anogo ka ana tsüngda lemtettsü, ta shisem.