PDA sorkari tiyazü nung tenüng agir: NPF

Dimapur, Rongchii (April) 9 (TYO): Taoba Chief Minister T.R Zeliang lenisüba kübok NPF-i aniba DAN sorkari Niti Aayog aser Ministry of Finance, GOI dang nungi sen crore 185.09 meshizüka liasü
Taoba Chief Secretary aser State RD Department-i acha-ayanga senji Yimpoksüi (November) 8, 2017 nü lemzüktsü, ta Naga People’s Front, Central Headquarters, Press Bureau sangdong ka nung metetdaktsü.
2017-18 atema special sanction ji Nagaland state nem tang mezüng atema agütsü aser iba senji Linük Temzüng nung Part 9 aser Part 9(a) nung madenba tesemtem atema agütsü.
Küm asem tashi Rural Development Grant-in-Aid aser Matching Cash Grant den School Education, Power, PHED aser H&FW ama communitized department tem indang scheme tem magütsüi aliba agütsütsü atema senji meshi aser Tsüklai (February) 2018 nung agütsütsüba liasü. Ajisüaka, election model code of conduct mapa tenzükba ajanga State Assembly Election tembangba sülen ang agütsütsü atema anendaka ayu, ta NPF-i metetdaktsü.
Tanü Chief Minister, Neiphiu Rio-i par sorkari Rongchii (April) 24 nü VDB allocation lema agütsütsü aser iba anogoji ‘Communitisation Day’ asütsü ta asüküma jembir. Paisa kasa anogo nung Village Development Boards aser Village Councils ajak Kohima-i arutsü atema jaokogo. Iba ya ak aser azü na mapa inyakba otsü nung azüi tatem nung tenüng tajung agiba amatu lir, ta NPF-isa ashi.
PDA sorkari iba sen atema taoba sorkar tenüng asangtsüla saka tangari inyakba atema peii inyakba ama tiyazü nung tenüng magitsüla, ta NPF-isa metetdaktsü.