PDA sorkari yimjung olemtep nung yariteptsü; kechisarena ajak nung terenlok bener arutsü: Rio

Kohima, Yimpoksüi (November) 8 (TYO): lndo-Naga yimten tebilemtsü latettsübaji NDPP indang tongtipangtiba mapa lir anungji olemtep nung adenba telok ajaki mapa tekaraba nung inyaka, ajaki agizüktettsüsa telemtetba agitsü mepishir, ta tanü Nagaland Chief Minister Neiphiu Rio-i metetdaktsü.
November 8, 2018 nü IG Stadium, Kohima nung 3 buba NDPP convention nung o jembidang Rio-i ashiba agi, Naga nunger yimten teloktem aser India sorkar tsüngda küm 20 dak tema olemtepa arur.
“Yimten tebilemtsü atema olemtepba nung asenoki (NDPP) teyariteper ka ama maneni shilem agitsü” ta paisa nangzük.
Paisa lokti tentettem, civil society, kin hohotem, arogotem, NGO tem aser nübortem ka küma longjemtsü atema ayongzük.
Speaker Vikho-o Yhoshu lenisüba kübok State Assembly nung züngsemtemi Joint Legislators Forum tentetshiba atema Rio-i tenüngsang agütsü.
NDPP indang olen ka jembidang, “party ya democracy aser ochishiba nung amendaker tentetba regional party ka lir. NDPP-i nübortem taginüba aser ola adokba atema noktaker aser party indang high command ji teküpoktiba jenjang nung aliba nübortem lir” ta ashi.
NDPP ya people’s movement ka lir aser onok ya regional party balaka lir, ta Chief Minister-isa shisem.
Tesüiba ita 8 tsüngda NDPP-i aniba PDA sorkari inyaktetba mapa kar osang lemsatepdang Rio-i ” VIP sobaliba agienba aser sorkar ketdangsübaren o terenlok nung temulung agütsüba ajanga sorkari Good Governance/Transparency bener aruogo” ta ashi.
Sorkar department ajaki pei pei websites lapokogo aser nübortemi sorkar den melamela tongteptsü atema social media nunga mapa inyaker, ta paisa shisem.
Tongtipang schemes aser programs indang osang metetdaktsütsü atema CM Dashboard tenzük aser külen mapa shitak inyaktsü atema biometric attendance agitsüsa ta ozüng yanglu, ta Rio-isa metetdaktsü.
Roads, Communication and Transport tajungba akümba osang metetdaktsüsang “iba sorkar atema tongtipang teinyaktsütem rongnung lenmang tajung agütsütsüba lisü aser onoki district ajak nung tongtipang lenmangtem yanglushiogo” ta paisa shisem.
State nung investment maparen tajungba kümdaktsütsü atema Investment and Development Authority of Nagaland tentetogo aser tourism sectors ajungketba den Kohima jila atema Augmentation of Water supply mapatongtem tenzükogo, ta paisa metetdaktsü.
Youth Resources & Sports kübok Dimapur nung Nagaland atema mezüngbuba Ranji Trophy Match asaya aser iba nung Nagaland cricket team-i mezüngbuba match koka otsü tasen ka yangluogo, ta Rio-isa ashi.
Kaketshirtem yaritsü atema state senpong nungi Post Matric Scholarship nung 50% agütsüogo. India sorkar nungi senotsü menguaka onoki scholarship agütsü aser PDA sorkarisa Students Insurance Scheme tenzüktsüogo, koba janga kaketshirtemi lendong tulu ajurudang sen lakh 5 insurance angutsü, ta Nagaland chief minister-isa metetdaktsü.
PDA sorkari kechisarena ajak nung terenlok aser tejakleni aotsü tenangzükba agiba meraksatsü aser iba alizüngji tongtettsü atema meranga inyaktsü, ta Rio-isa nangzük.
Tanü NDPP indang 3 buba General Convention nung bangzüng 10 renem aser ibaji Planning and Coordination and Land Revenue Minister, Neiba Kronu-i benokba sülen teloki teka metonga agizük.