PDCK puri Karbi nunger tanga kin den kibalembutsü nokdang

July 2, 2017 (Agencies): Assam nung Karbi kin extremist telok kati par kin tetsür tebur ajak pei kin alema tangar kin den kibalembura senchi den teka sangshia merenshitsüba sangdongogo. People’s Democratic Council of Karbi-Longri (PDCK) shirnoki parnok central Assam’s Karbi Anglong district kübok aser iba tesem alema or aliba karbi kin temeden atema rarar ta jembir, parnoki Honibarnü Karbi nunger tem par kin alema or tanga kin den kibong akümtsüba nokdangogo.
Iba ozüng kübok aibelenra senchi sen 500,000 achitsü aser tekasangshia merenshitsü, ta parnoki amokmeren.
“Tetsü tebu mapang nung Karbi nunger kodanga tanga kin den meyoktepa maru aser tangar den ojembitsüba aser chiyongtsü lemsateptsübaji abelen ka ama züngshi. Karbi nungertemi tetsütebu tsüngsü nung manidakra, mapang ka arutsü aser asen sobaliba tajung meyoktepa akümtsü,” ta PDCK telungpur tekolakba David Mukrong-i ashi.
Pai ashiba agi, kin tanga den meyoktepba ajanga yimya tamajung; senmen agütsüba, tashiyim agi raksatsüba, teim mesüi kongshiba aser nisung tepsetba amala tangar sobaliba nungi angazüktsü.
PDCK-i maneni tetsürtem dak temi mesüi kongshiba aser tashiyim agi raksatsür nisungbaji tepsettsü ta sangdongbaden külemi yi, moko, nüktabangta dak sendakba nung noksa aser video aser tanga temesepba chiyongtsü balala school anasa, tenlaki anasa aser club tem nung mayoktsü asoshi metetdaktsü. Iba ozüng nung manidaker atema temerenshi tesashi agütsütsü, ta metetdaktsü. Iba tetuyuba nung aibelendang senchi sen 1,00,000 achitsü ta metetdaktsü.
“Northeast nung telungpur telok tasen akati yimden yimsüsübaren nung lokti tebilemtsüdak ajemdaker nüburtem nungi teyari angutsü meranger, saka PDCK puri par kin tangar den memeyokteptsüba tebilemdangba ya India linük tesem kar nungi angazük südi,” ta Assam police ketdangser kati ashi.
National Socialist Council of Nagaland-Khaplang aser Paresh Baruah-i aniba United Liberation Front of Asom-Independent telok nati PDCK kümtettsü asoshi Karbi tribal telungpur yaria liasü aser iba telok ya Myanmar nung 2016 October nung kümtet.
PDCK ya Ingti Kathar Songbijit-i anir tenzük. Pa ya taoba mapang nung National Democratic Front of Boroland (NDFB) tekolakba liasü. Songbijit-i anir 2014 küm Assam nung Adivasi nunger parnok 80 tashi tepsetba atema parnok ozüng alema inyakba ren nung ajaki meteta aküm.
Songbijit, Boro nunger atema masü saka par kin atema raratsü asoshi NDFB küm ka tejakdang toktsüa liasü.