PDR-i Nagaland Finance Department dang kulitem meshir

Dimapur, Luroi (August) 19 (TYO): Nagaland Finance Department (B&MC)-i “financial assistance to UPSC candidates” ta ser Prelims takok angur asoshi anaben tashi sen ajak agi lakh 45 lemzüktsü.
Senji CMCF kübok Planning & Coordination Department tenüng nung agütsü. 2016-17 UPSC candidates atema March 18, 2017 nü sen lakh 20 aser 2017-18 atema December 12, 2017 nü sen lakh 25 lemzüktsü, ta Publicity & Media Affairs PDR-i metetdaktsü.
CMCF kübok kaketshir nem teyari agütsüba osang aser candidate shia nem sen agütsüba Planning Department-i metetdaktsütsü mepishir. Financial year ana nung sen lema agütsüba aser UPSC ajangtetba kaketshirtem indang osang metetdaktsütsü asüngdanger, ta PDR-i sangdong ka nung ashi.
UPSC candidate tem ajungmesotsü atema senotsü teyari agütsür. UPSC aser NPSC candidate tem ajak ajungmesotsü atema NPSC Prelims nung takok angur nem-a iba ama teyari agütsütsü akok asü masü’ar Planning Department dangi nungi telangzüba aginür, ta parnokisa ashi.
Külen, B&MC Finance Department-ia December 6, 2017 nü beneficiary 71 nem teyari agütsütsü atema sen lakh 190 aser CMCF 2017-18 kübok mapatong balala atema beneficiary 45 nem sen lakh 50 lemzüktsü.
Iba ama senotsü teyari angurtemi mapa meinyaki sen agiadoker. Kari mapa kecha meinyaker aser kari mapa tenzüktor tom nung anener. Mapa inyaktsüpurtem nem sen magütsüba ajanga public sen amajok nung endoker.
Sorkari senotsü amshiba metettsü atema PDR-i Planning Department dang sen lakh 50 lemzükja agütsüba beneficiary 45 aser project tem metetdaktsütsü asüngdanger, ta Publicity & Media Affairs-isa metetdaktsü.
Maneni, Finance Department-i March 20, 2017 nü CMCF kübok DA ajanga beneficiary 10 nem sen crore 10 lemzüktsüba tenüngtem yimjak nung metetdakjang ta PDR-i nenshia ashi.
Kasa mapang nung, Finance Department-isa November 3, 2017 aser December 20, 2017 anogotem Double DA agütsüba osang jangjashitsü nenshir ta parnokisa shisem.
March 30, 2018 nü sen crore 1 indang DA Planning Department tenüng nung agütsü saka mapabo Evaluation Department kübok inyak. Ajisüaka, iba ya department balaka lir aser parnok indang Demand No 44 lir, iba ajanga Evaluation Department ya Corporation aser government undertaking ka ama dang kümdaktsüogo, anungji Planning Department-i iba osang jangjashitsü nenshir ta PDR-isa ashi.
Item onüktem atema osang tejangja aser kuli magütsütetra CMCF kübok beneficiary ajakji bogus ta züngshitsü aser Finance Department-i lemzüktsüba DA ajakji alia inyakba ama asütsü. Iba PDR-i item kuli tatem tashi bushitsü, ta sangdong nungsa metetdaktsü.