PDS jang asenok dang Rs 35 agi ayoker: ACAUT

Dimapur, December 10 (TYO) : Asenok indang jang, seret nung sen 3 yong agütsütsü aliba magütsüi kasa jangji asenok dang seret nung sen 35 yong ayoker. Anungji, iba atema Food and Civil Supplies Department-i telangzüba agütsütsüla, ta ACAUT Nagaland-i Honibarnü takhangba agütsüogo.
Onük kar nung Nagaland Chief Minister, Nagaland Police aser Food & Civil Supplies Department-i Naga nungertem nem telangzüba agütsütsü tim, ta Media Cell, ACAUT Nagaland-i sangdong ka ajanga metetdaktsü.
Mr. Tinku aser par Managar Mr. Nirmal Jain na anema FIR ka benokba sülen item nisung aputsü atema police-i mera karbo agir asü ? Teratatsü mali, tai tonglokja alirtemji tashi aliba nisungtem, aser tesüiba küm 20 tashi parnok dang kecha meshiteter, kechiyong parnokji yimtenren lenirtem, Naga yimtenren teloktem aser tanga teloktemi kümzüka ayur, saka ibaji ajanga Dimapur police tenüng amajok mekümdaktsütsüla, ta ACAUT-isa ashi.
FIR atema mapang agitsüsa yimtenren tsütsü nungi police nem pressure kar agüja ali asü? Yamaji mesüra Dimapur aser telongtet nung FCI jang aser wheat tanaben sepdena shishilembaba mills 15-20 shiji police-i kechiba mita mao? Tang tai tonglokja alir densema stockist temi item mills dangi FCI jang aser wheat yoker, aser tanaben sepdenbaji branded jang aser wheat ama tongmelang consumers dang ayoker. Iba ken o tashimait kümdaktsütsü atema tebilemba melira police-i FIR benokba anogo, December 9 nikongdangjisa item mills ji mita aotsüla, ta ACAUT Nagaland-isa metetdaktsü.
Sen crore aika ochimashi nung Mr Tinku densema aliba nung ajemdaker Food & Civil Supplies department-i pa nem Super-Stockiest license agüja alibaji agientsü asü (?) ta ACAUT telokisa asüngdangogo.
Tang tai tonglokja aliba nisungtem indang bank accounts ji police aser saru ketdangsertemi anentsütsü asü? Tesüiba küm aika nungi Nagaland nung black money timtiba adokdaktsüba iba ochimashi ya ajanga lir.
Asenok indang jang, seret nung sen 3 yong agütsütsü alibaji agiener kasa jangji asenok, consumers dang seret nung sen 35 yong ayoker, iba atema Food and Civil Supplies Department bena alisang Chief Minister-i kechi telangzüba agütsür (?) ta ACAUT telokisa metetdaktsü.
Iba inyakyim ya taoba chief minister tem inyakdang tenzükba lir, saka iba ken o ya tang teinyakdak chief minister-i nübortem dang iba asoshi ochishia osang tejangja ka metetdaktsütsü aser Dimapur police nem sademsadema büshisüngdang südaktsütsü atema nangzüktsüla.
Iba ochimashi inyakyim ajanga bendenba sen ajanga telungpur teloktem yariba lira, ibaji NIA-i bushisüngdang asütsüla, ta sangdong ajangasa metetdatsü.