PDS jang belenzüka ayokba inyakyim ACAUT & CCN-i putet

Dimapur, Dec. 09 (TYO): F&CS department-i, Food Security Act (FSA) kübok Naga nüburtem nem PDS items tajungtiba nung lemtsütsü atema inyaker ta jembiaka, atangji nungbo yamaji masü ta jungkai adokogo.
December 9, 2016 nü ACAUT team den Concerned Citizens of Nagaland (CCN)-i Kevijau colony nung R.Z. Lotha Godown aser Lhomiti colony nung M/s Lotha Trading company mita aodang sen crore aika indang ochimashi mapa inyakba putet, ta tanü Media Cell, ACAUT Nagaland-i sangdong ka ajanga metetdaktsü.
Iba mapang, PDS item, jang sepdener synthetic bag temesüng meyirjang aika nung ayoktsü yua aliba angu, aser idangyongjisa ACAUT Team-i Sub-Urban Police Station nem osang sangoktsü.
Ajisüaka FCI Manager-i, FCI-i kodanga synthetic bags nung jang supply masür saka bosta nung ang supply asür, ta metetdaktsü.
ACAUT Nagaland-i, synthetic rice bags meyirjang aika- (bag 3500) shi angubaji sensakertem atema aruba PDS items lir, aser itemji open market aser mills nung yokshitsü ayuba südi ta bilemer. Iba maparen ya tesüiba küm 10 shi inyaka arur asütsü, aser iba ya jungjunga bushisüngdangba ajanga chichiba inyakyimji jungkai adoktsü, ta ACAUT sangdong nungsa shia lir.
ACAUT teloki semdangba mapang Godown nung in-charge temi, godowns anapronglaji Mr. Tinku aser Mr. Nirmal Jain na meyong lir ta ashi. Parnokisa, item jangji mill balala aser open market nung yokdoker ta metetdaktsü.
ACAUT Nagaland-i iba osang ya temeket aliba Village council 13 nem metetdaktsü aser parnoki tesem tonga oa reprangdangba sülen, bushisüngdang jungjunga metembang tashi Godown anaji shibanga yutsütsü ta Village council temi lemtet, ta sangdong nung shia lir.
Department-i lemzükja aliba FCI Godowns dak alia nija nem Godown ketdang südaktsütsü atema temelaba agütsüba atema ACAUT Nagaland-i Mr. Tinku aser Mr. Nirmal Jain na den Food & Civil supplies department anema Sub-urban police station, Signal bosti, Dimapur nung FIR ka benokogo