PDS ken o kanga junga bushisüngdangtsüla: MTLT

Dimapur, February 5 (TYO) : Mokokchung nung Fair Price Shop (FPS) temi ‘PDS’ jang auyazükba aser ozüng alema ayokba mapa atema kanga süoki ia bilemer, ta Mokokchung Town Lanur Telongjem (MTLT) sangdong ka nung metetdaktsü.
Mokokchung Police aser District Administration-i Arkong ward aser Tongdentsuyong Ward nung FPS godown ana mita aodang auyazükba jang aika ngutetogo aser godown anaji Police aser administration-i telok balala aser public matsüngdang shibanga yutsüogo, ta Public Grievances Cell, MTLT-i sangdong ka nung metetdaktsü.
PDS jang auyazüka ayokertem nem Arkong Ward nung aliba ‘Shree Bajrang Bahadur’ General Shop-i bosta tazüng belena agütsü ta tai tonglokja lir aser ibaji MTLT-i aitsür, ta sangdong nungsa shia lir.
Iba inyakyim bushisüngdangtsü atema Mokokchung DC-i ADC, Mokokchung lenisüba kübok Inquiry Committee ka tentetogo. Ajisüaka, iba luden nung civil society member ka mesüra ana adentsüla, kechiyong iba onük ya public dak sendaka lir. Ano külen, iba tim masüba mapa atalokaka District Administration-i kechiba aibelenertem dokan meshibangtsür, ta MTLT-isa sangdong nung shia lir
‘PDS jang’ ji loktiliba nung teyari nüngdakbapurtem asoshi lir aser sorkari mulungsoa agütsüba jang makamaiter dang nungi rakzüka agiba inyakyimji ozüng tesashi kübok aitsütsüla. Bangdakpurtemi iba inyakyim ya kanga junga bushisüngdangtsüla kechiyong mapa tuluba ka rembanga alitsü, ta MTLT-isa ashi.
Maneni MTLT-ia iba dak sendakba inyakyim azüoktsü atema mapa inyaktsü, ta sangdong nungsa metetdakja lir.