Peace Conference matongdang Suu Kyi-i telungpurtem den ajurutep

July 17, 2016 nü Yangon, Myanmar nung Myanmar State Counselor Aung San Suu Kyi-i (tiyongtsü) United Nationalities Federal Council (UNFC) lennirtem den seden ka amendang agiba noksa angur.

Yangon, July 17 (Agencies) : Myanmar nung yaküm sorkar den yimjung tenangzüktep agiba nung madenba telungpur teloktem den Deobarnü State Counselor Aung San Suu Kyi-i ajurutepa senden ka amen.
Myanmar nung civilian sorkar taseni linük nung civil war anendaktsütsü atema mapa inyaker aser tanü amenba sendenjia iba dak sendakba nung ayonga amenba liasü.
Yangon nung aliba National Reconciliation and Peace Center nung Suu Kyi-i United Nationalities Federal Council (UNFC) taser kin 11 nungi telungpur teloktem den senden amen.
Iba senden nung telemtetba kecha magi saka taruba peace conference nung parnok dendaktsütsü atema tebilembatem lemsatep, ta sorkar atema o jembir Hla Maung Shwe-i osangbener dang ashi.
Yaküm October ita Myanmar nung kin 13 nungi telungpur teloktemi Nationwide Ceasefire Agreement nung maden. Nationwide Ceasefire Agreement nung taoba mitkartemi aniba sorkar aser telungpur telok 8 tsüngda tenangzükba agi saka iba nung telok tila asem medendaktsüba atema tanüngba telungpur telok 13-i madentsü telemtetba agia liasü.
Tang Myanmar nung Suu Kyi-i aniba sorkari yimjung maparen nung ajak dendaktsütsü ta tenangzükba agia metetdaktsüogo saka taküm August ita agitsü aliba Union Peace Conference nung telungpur telok kwi dendaktsütsüar ano osang kecha memetetdaktsüi lir.
“UNFC lenniri State Counselor dang peace conference magidang parnok telungpurtem senden amentsü indang osang metetdaktsü” ta Hla Maung-isa shisem.
July 26, 2016 nü Kachin state nung kin balala nungi telungpur teloktem den senden ka amentsü sentong lir.
1962 sülen mezüngbuba civilian sorkar dak temulung alemer, ta UNFC chairman aser Kachin Independence Organization vice chairman, General N’Ban La-i metetdaktsüogo.
“Onoki takok angutsü imlar. Ibaji sorkar dak dang keta lir, sorkari telungpur teloktem taginüba tongtsüra, takok angutsü” ta Honibar nikongtsütsü Yangon airport nung General N’Ban La-i osangbener dang ashi.
1948 küm Britain nungi nüjiso anguba sülen Myanmar nung kin balala nungi telungpurtemi parnok sasa ketdangsüa alitsü atema sorkar aser mitkartem den rarayonga arur.
Yaküm November 8 election nung takok tulu anguba sülen taküm March ita tentetba Suu Kyi’er National League for Democracy sorkari yimjung aser putepshibaji tongtipangtiba mapa asütsü ta lemteta mapa inyaker.
1947 küm Suu Kyi tebu Gen. Aung San-i , Shan, Kachin aser Chin kintem den Panglong Agreement agitep.
Iba mapang Aung San ya Burma Executive Council nung deputy chairman inyaka liasü aser ibaji British governor kübok prime ministerial menden ama liasü.
Ajisüaka, July 1947 nung pa kahsetba sülen tenangzükbatem mapa küma meinyaktet aser kin balalai prangpong-injang amshia sorkar anema raratsü tenzük. Iba jagi Burma (tangbo Myanmar) nung alima nung civil war talangtiba rarayonga arur.