Pei asoshi dang mebilemli

Alima nung kintem telok ana kümer raratsüsa atalokba alima rara mezüngbuba anenba anogo bilemteta yakanü November 11 nü France yimtiba Paris nung US tir  Donald Trump aser Russia tir Vladimir Putin na dena alima kin 70 nungi yimsüsür tekolaktem adenshia amongba sentongji alima yimjung asoshi inyakba mapa tongtibang ka asütsü. Alima nung kin o kin na rara adokba ya pei kin kija ulutsü aser ajungtsü atema bilemba nungi tenzüker. Ajisüaka, alima rara tenzükba mapa nung ya shinga majangzüker saka ajak akoksar ta tang tashi nung anaben tashi alima rara adoka raraba mapatem nung ajaki ajangshiogo aser metetogo. Ibayongji, tangbo alima kintem telongjem, United Nations, tenzüker akok tashi akhidang ama alima rara madoktsüsa inyaka arudagi. Ajisüaka, alima kin tului tila aser takar limai sensaker lima amokbangtsü merangba asenoki angur. Ano külen, alima kintem rongnung kin kar anema kar den puteptsü asoshi yaritepba aser shishilemba angur. Item maparentem jagi, tanü putu nung alima rara madokaka, alima kintem ajak tarendak aser tetsübu nung alir. Ibayongji, tangar lima amaktsü asoshi bilema meinyakaka, pei lima tsükchir ket nungi kümzüka ayutsü asoshi alima kin shiai miima raraba oset tesashi yanglutsü bilemer. Aji oda, alima ajak kenyongi samatsüsa raraba oset tesashi yanglur ta temulung melemi bilemba ajanga tamalen US-i Iraq amak aser tang North Korea den ken o tejembidak lir. Ano, tanü putu nung alima meimchirtem asoshi tetsübutsü mapaji injang mekadoktsü aser bomba mapoktsü saka mopong nung dang miim tango (Chemical weapons) chioktsü ta asüba tetsübutsü raraba oset yangluteta lir. Iba miim tango ya Syria nungertemi amshir ta UN-i dena aitsüogo. Iba ama tetsübutsü raraba osettem yangluba nung alima kintem rongsen aser nübo meindoki alima rangben tzü mopong ajungtsü asoshi aser alima kintem putepa alitsü atema inyakba sentongtem nung dang kin ajaki temulung agütsütsü junger. Iba tangatetba nung, yakanü par lima nung, alima kintem 70 nungi adenshiba yimsüsür tekolaktem den jembidang, France tir Macron-i pei lima kisüng kümzüka ayutsü bilemba shisatsü melili ta ashibaji alima kintem ajak atema yimjung tayongzükba ken o kanga tongtibang ka asütsü. Pei lima kisüng meimba agi alima nübortem samatsüsa inyakbaji peisasa pei ashioktsüba mapa ka dang asütsü ta Macron-i metetdaktsüba o nungji tebilemdangtsü aser tagitsü o keta lir. Joko alima nung kin o kin na merarai yimjung nung alitsü asoshi jembidang, asenok Nagaland nung Naga nungertema pei kin kija ajungtsü aser ajangzüktsü asoshi dang mebilemi Naga nunger ajak ya kin ka aser kibong ka chir ama bilema asenoki inyakra, alima nung teputep aser yimjung limaji Nagaland asütsü. Atangji, alima nung kin o kin na aser nisung o nisung na meputep adokba ya pei kija agitsü aser pei kija ajungtsü bilemba nungi tenzüker. Ajisüaka, asenoki jungjunga bilemdangra, alima rangben madak ya alima kin katibo yimsü mesütettsü aser ano tangar teyari medeni alima kin ka kija melitettsü. Iba tangatetba nung alima kin shiai kati ka anemtsü bilema masü saka kati ka yariteptsü bilema inyakra, memeteti alima ya yimten yimli ka kübok alir amai dang kümadoktsü. Iba kasa tangatetba nung Naga nungertema kati ka akümtsübutepa yaritepba sobaliba ka tenzüktsüla. Atangji, alima rara madoki alima kintem ajak putepa alitsü merangyonga, ano asüngbo alima kintem rongnung anüng nung ita aser petinu rakteptsüa akok. Alima asoshi lendongji ajisa tuluba asütsü. Iba ama putu ka nung Naga nungertem government mapa tilaka atema mesüra district tilaka akümtsü asoshi tamajung agitepa mekazüi, longjemshir tangar tejakleni aoba kintem dang nungi shisa tasen angazüka asenok temetetba, tangatetba, inyaktetba aser akaba nung tejakleni ao tenzüktsüla.