Pei atema dang mebilemi loktiliba asoshi inyaktsüla: P B Acharya

Dimapur, September 19 (TYO): Kin aser telok balala nungi nisungtemi pei atema dang mebilemi, loktiliba ajungtsü atema bilemtsüla aser tangartem yaritsüla, ta tanü Nagaland aser Arunachal Pradesh Angh, P B Acharya-i ayongzük.
S D Jain Charitable Clinic-i balaka soteter nem calipers aser wheelchairs agütsüba sentong nung o jembidang, Acharya-i “taoba mapang parnok dang ‘apangs’ (disabled) ta aja saka Narendra Modi sorkari parnok nem ‘divyang’ (divine body) ta tenüng jaloktsü” ta ashi.
Jain nungertemi balaka sotetertem yariba atema paisa tenüngsang agütsü aser nübortem tenzükbaji Tsüngrem tenzükba den kasa lir ta shisem.
Jain nungertemi Dimapur nung alirtem tenzükba mapaji kanga dang tajung saka nenoki maneni social service talila inyaktsü merangtsüla, ta Acharya-isa ashi.
Digambar Jain nungeri nübortem tenzükba indang lenmang sayuogo. School yangluba aser tanurtem nem shisaliok agütsübaji nübortem tenzükba wadang nung mapa tulutem lir, ta paisa shisem.
Angh Acharya-isa Jain nunger dang Dimapur nungdang masü saka Nagaland kübok tanga tesemtem nunga nübortem yaritsü atema tayongzükba agütsü.
Iba sentong nung Dimapur Deputy Commissioner, Kesonyu Yhome-ia Jain nunger nem tenüngsang agütsü.