Pei chir asem tepsetba atema tebu taküm piyong tepuokdak ayutsü

Dimapur, December 18 (TYO) : Tanü Hokolbar nü District Sessions Court Dimapur nung tebu kati par chir asem tepsetba temerenshi pa taküm piyong tepuokdak alitsü asoshi obendang agütsüogo.
Taküm piyong tepoukdak ayutsü temerenshi angusangji nisung ka tenüng agi Hoilyunging liasü. Pai 2009 küm April 6 aonung par tanur asem mejanga alidang nok agi tepset. Item tanurtem tenüngji Rampauchilung (13), Maheinglung (10) aser tanutsüla Ingausilie (8) liasü.
Iba ken o ya okadak jembidang, pei chir tepsetsang tebu jagi, pai par chirtemji yi agi meseper kecha memeteti tepset, anungji pa nem taidok agütsüdaktsüner ta mepishi. Ajisüaka, tashitemeteter obendangeri angatetba ka metetdaktsü dang, pa dang shingaia kangshia yi mejemdaktsü aser pai kecha memeteti inyak ta asüba kuli kecha mali, anungji pai yi agi meseper kecha memeteti inyak ta ashiba nungji kecha balaka mereprangteter, anungji aibelensangji  Indian Penal Code nung Section 302 ajanga merenshitsü langa lir ta metetdaktsü.
Tanü Dimapur District Session court nung obendang agütsüsang obendangeri ashiba agi, tang tashi nung tebui pei chir asem tashi tepsetba ken o nung kulitem ajak bendena reprangdangba nung, nisung tepsetsang jagi pai memeteti tepset ta amangtsüsa masü inyakogo ta angatetter, ajisüaka pai aibenlener aakba agi pai pa aibelenji yi nem tongloktsü aser memeteti inyakba ama kümdaktsütsü mepishi. Ajisüaka, pai par chir asemji tepset ta kecha terata melii kuli sütetter, anungji nisung tepsetsangji IPC 302 kübok aitsür ta obendangerisa metetdaktsü.
Kibong ka nung tanur asem samaba aser aibelensangji tanurtem tain mekümjungi arishi tembangtsübaji bilemdangdang aser ano tetsübo taküm lir asünungji, aser tebubaji taküm piyong tepuokdak ayutsü obendang agütsür asünungji, la nemji state sorkari Nagaland Compensation Scheme 2012 nung metetdaktsüba ama Cr.PC section 357-A nung ajemdaker senotsü temenok agütsütsüla ta obendangeri tanur asem tetsü atemajia obendang ka agütsü.