Pei dak malangba rongsen bendenertem lir asü ?

Küm 33 lir tashi Central Bureau of Investigation (CBI)-i bushisüngdanga aruba sülen Nagaland nung taoba Chief Secretary Surinder Singh Ahluwalia, IAS (retired) aitsüsa parnoki kulitem bushiteta okadak agütsü aser item kuli nung ajemdaker okadaki pa aitsüogo. Delhi okadak kati September 6, 2019 nü SS Ahluwalia küm pungu tepuokdak ayutsüba den sen lakh 1.5 senchi achitsü oshidang agütsüba asenok osang angazükogo. Ahluwalia ya prangpong-injang ken o ka nung ang aitsü, saka tetenzükba jibo pa ya tanga ken o ka nung ang tai tongloktsüba liasü, aser iba nungji ajemdaker CBI-i pa anema bushisüngdang tenzük. P Chidambaram-i Union Minister of State for Home Affairs inyakba mapang Nagaland sorkari Ahluwalia anema mezüng ken o ji benok. Nagaland nung taoba Chief Minister asür Hokishe Sema-i Union Home Ministry dangi shidi ka züluba nung Ahluwalia-i pa dak malangba rongsen bendena lir ta tai tongloktsü. Iba onük nung ajemdaker CBI-i Ahluwalia anema bushisüngdanga arudang, 1980s mapang pai ochimeshii Rs 68 lakh jungnüa rongsen bendenba bushitet. Ajisüaka, iba mapang CBI ketdangsertemi Delhi aser Kohima nung Ahluwalia’er ki mita aodang prangpong pezü den injangtem ngutetba ajanga parnoki, pa anema ken o balaka benoka liasü.  CBI-i 1987 küm Ahluwalia anema prangpong-injang onükji benok aser bushisüngdang tembangba sülen, 1992 küm pa aitsüba kulitem agütsü. Ajisüaka, iba ken o angadanga arur 2010 küm ang okadaki Ahluwalia dak tai tongloktsü aser tatemsa September 6, 2019 nü okadaki pa aitsüogo. 1986 küm asür Hokishe Sema-i Chidambaram dangi züluba shidi nungji Ahluwalia-i IAS akümba sülen ochimashi mapa aika inyakogo aser pa dak malangba rongsen jenti bendena linük kübok tesem balala nung kiojen aika alizüka lir ta shia liasü. SS Ahluwalia-i pa dak malangba rongsen bendenbaji, pai küm 18 tashi ketdangser ka ama inyakdang bendenba liasü ta CBI-i bushitetba osang agütsüogo. Ajisüaka, iba onük dang nungi prangpong-injang onükji tuluba kümer, CBI-ia iba nung ang temulung agüja bushisüngdanga arur pa aitsüogo. Pa dak mezüng tai tongloktsüba onükji iba nung tembanger asü mesüra ano CBI-i tanaben kakteta bushisüngdangtsü’ar iba osangji ano kecha mali. Ahluwalia ya 1969-batch IAS officer ka liasü aser pa ya Nagaland cadre nung shimok asü nung, pai sorkar mapa inyakdang, mapang talangbalen Nagaland nung inyakogo, anungji pa dak malangba rongsen benden ta tai tongloktsübaji, pai Naga nunger indang sen miimzüka agiba asütsü aser iba jagi ang taoba Nagaland sorkari pa anema ken o ji benok asütsü akok. Tanü-a Nagaland nung SS Ahluwalia amaji tangalen nungi ketdangser aika arua mapa inyakdar aser parnok aika menden tulu nung mener state sorkar ketdangsüba nung tongti shilem agidar. Süra, tanü-a asür Hokishe Sema ama mesüra taoba Nagaland sorkar amaji inyaker lir asü mali ta tasüngdangba ka arur. Naga nunger sen miimzüka mesüra auyazüka, pei dak malangba rongsen bendenba atema shishia bilemba agi, iba mapangji SS Ahluwalia dak tai tonglokja ken o ji benok asütsü akok. Anungji, tanü-a yamaji tenük yoka anüker Naga nunger lir asü mali mesüra asenoka parnok amaji kasa, pei dak malangba rongsen bendener, aser iba jagi ang ola madokteter’ar, khen shisadangdi.