Pei kidang oshi samar

Tanü asüng putu ya alima rangben agi yimtsüng ka ama kümer aliba mapang lir, anungji alima nung alir kin aser oshi ajakji asen kin aser asen yimer oshi amato kümer alitsüba mapang lir. Iba jagi tashitemetetter aser tashi taitba kintemi jembiba oshi agi kin tila aser teküpbok tia nung alir nübortemi jembiba oshi aika amoksepdaktsür. Meimchir yimya agi, ajaki takar aser temetetter jilu ajizüka linür, anungji aiben tilar aser sensakertemi takar aser temetetter kintemi benshiba yimya aser jembiba oshi sülen aotsü merangdang, pei sobaliba aser oshi amadoker aser tangar kin sobaliba aser oshiang tesabuba akümer. Tanü asenok Naga nungertem aser talisa, Aortem rongnunga, pei tetsü oshi sapua  jembitsü melen English-ang tesapuba aser Nagamese-ang tesapuba ta jembiba ya asen dang nungi English aser Nagamese jembirtemji tashiba aser temetetba asüba agi, parnok jiluji ajizüka alitsü merangba jakla sayuba ka lir. Iba jagi asenok ama tangar memenepba kin aser nübortem sobaliba aser oshi memeteti küm ishika tsüngda tejembir kata mali samadaktsür. Atangji, tangar tashir aser temetetter kintem oshi aser sobaliba tajung angazüka benshiba aser jembibaji junger, iba jagi tashir temetettertemji menepa asenoka libaliro aika nung renloktsü, saka tangar ama tajung akümtsü merangdang asen lipok, asen oshi aser asen sobaliba amadokra asenoksasa asenok tesamaleni aoer asütsü. Alima tesem kong lidir liaka, Lashiba nunga Yisu jakzükba kidong otsü tarensena zülua aliba amato, asenoka kong nungi jakzük, kechi kin aser kechi oshi jembir ta asübaji alima mesama tashi asenok ayak aser temeten asütsü. Ibayongji, tanü asüng ya balaka asenok rongnung asen tetsü oshi mesamadaktsüi wazüka ayuba dang masü saka renlokdakja jembitsü asoshi ajungshiteper. Aji oda, tangar dang masü, asenoka tang ya asentenshia asen tetsü oshi sapua jembitsü metenzükra, taruba küm noklang ka sülenbo alima nung Ao oshi jembir züngdangteta dang asütsüsa asenok kibong aser loti tia kati idagi. Joko, tang ya lanur kibong aika nung tsüraburtemi Ao mashi, anungji English aser Nagamese dang jembir, anungji 2050 küm alima anitsü pur par chir chirtem jagibo Ao kenyongi mangateti akümtsü. Aji oda,taruba küm 80 tsüngda tang Ao junga jembir, asenok ajak ya sümadoktsü. Idangjibo, tang amaisa ora, kidang dang masü saka lokti, arogo aser yimden senden ajak nung Nagamese aser English agidang jembitsü. Tanga town-tem nungbo lanurtem sentep aser senden nungbo aikati Ao mejembir. Ibaji asenok asoshi shisabolutsüka lir. Kodang iba shisabolu tenzükba tesem aser mapaji bushia odir, ibaji tanga tesem nung masü, pei kidang aser pei kibong nungi tenzükba asütsü. Mapang ka kibong tasen ka nung tanur anepalutsü asoshi tangalen nungi tangar bendanger chanu ka anir arua kidang lidaktsü. Iba nisung nemji dang tanurji toktsür tsürabur anaprongla anogo shia pei mapai oli nikongtsütsü dang aruli ta süa tanurji tain aküm, anungji kidang tanur jagi pei tsüraburi jembiba oshi masü saka pa anepalusangi jembiba oshiji dang jembi. Iba denji ano anogo piyong tv reprangba agi tv nung aruba oshi dena kanga junga angazük saka pei tetsü oshibo kenyongi mejembitet, kechiyong aji pa dang mesayu. Iba amaji kibong aika nung pei tetsü oshi samaogo. Iba tebilemtsüji reprangteta taoba hopta nung asenoki asen Ao oshi renlokdaktsütsü atema, Aor kibongtem nung teyaritepertem tangar kin nungi masü Aotsür Aortem dang ayu nunga koma süla (?) ta asüba nung shisadangogo. Aji oda, kodang kidang teyaritepertema asen nisung yudir kidangbo Ao dang jembitsü, anungji tanurtemi memeteti pei tetsü oshi kanga junga angazüktsü. Atangji, tangar nisung kidang tak ta mayutsü ta masü saka parnok nem asenok yaridaktsütsü dang bilema masü saka parnok tajung kümdaktsütsü asoshi bilema asenoki ayutsü akok. Ajisüaka, tang nungibo kidang shiba yudir yuang, asen kidang aser asen kibong nungbo asen tetsü oshi dang jembitsüla. Iba jagi asen nem pei lima meimba shisatsü aser aküm ka agütsütsü aser pei tetsü oshi ajangaji dang asen kibong aser asen kinungertem aser asen kin aser nübortem angatettepa longjema alitsü.