Pei kümdang kümdangtsüla

Tsüngremia yaritsü saka pei kümdang kümdanga alitsüba lima ka nung asenok alir, anungji, talisa, tang ama tashidak tasen pokteta alima ajaklen menatepa oa nisungtem taneptsü menguteti asüba lendong mapang ya akhidang dang nungi tangsa tekümdangba alitsü nüngdaker. Tashidak aika tzü mopong ajanga menatepba tashidak lir, ajisüaka tang poktetba Coronavirus tashidak yabo tzü mopong ajanga masü saka nisungi nisung dak menaloktsüba tashidak ka lir. Iba jagiang, akok tashi, tashidak aser mozü shitettertemi nisungtem ajurudang salema mesalemtsü aser lokti nungi pilaa alitsü ajungshir. Ibayongji, asen lima nunga lokti senden ayongzüka alibatem thitemogo aser kaketrejutema shibangogo. Ibaji dang masü saka Tsüngrem külemdak dena sentep sentong malitsü asoshi arogo karibo telemtetba agiogo. Item ajakji nisungtem rongnung tashidak menatepa maotsü asoshi nokdangba sentongtem lir. Ajisüaka, asenok asoshi tasak kaji mapai moura chiyongtsü mangutsü, anungji mapaibo aotsüla. Ibaji dang masü saka asen sobaliba nung asenok ya lokti nisung, anungji nisungtem den ajurutepa meliang asenok melitettsü. Aji oda, tashidak mena tsübuba agi asenok kechalenia moi kilong nung shibangerbo mekazütettsü, anungji shisabolutsü kaji, iba tashidak ya asenok rongnung kati danga menara, pa mesüra la dak nungi melamelaa menatepa aotsü. Asenok tenük agi tashidak mesen mangur, asenok asoshi timtemji aji lir. Ashi, tashidak mesenji asenok tenük agi angu asübo, asenoki mekongshila aser mesenji melamelaa tesepa endokla. Iba coronavirus tashidak mesen ya nisung ka dak kodang tongdir, pai mesüra lai kongshiba ajak nung tashidak mesenji alir aser iba mesen alidak kongshir ajak dak iba mesenji iadoker. Iba jagi iba mesenji südaktsütsü atema mozü tzü agi teka shidoker aser nisungtem amenba tesemtem dang masü saka gari aser tayimtsü nung dena mozü tzü raka shidoker. Iba tashidak ya tetsübutsü maket asübo tanga tashitemetetter limatem nungang zübazübaa agila, saka tanübo China nungi tenzüker America aser Europe limatem tashi nung lokti adenshidak tenla ki tashi shibangtsüsa akümbaji, kanga zübaa yutsütsüla tashidak kabo masü. Joko, alima aika nung chiyongtsü aser mozü ayokdak dokantem dak alaka tanga osettem aser süoshi ayokba dokantembo shibangdaktsür. Iba ama mapang ka nung asenoka kanga nüngdak ka mesüra aginüba mesüra ajurunüba kisüng agibo dokanlena mesenzütsüla aser tangar kidangia maotsüla. Asenoki metettsüba kaji, asenokbo tongmelang nisung asünungji, kecha balaka arendaka mebilemtsüa akok saka tangarbo asen amato masü, kanga kümdanga alir aika lir, anungji asenok oaka parnoki asenok ajurutsübaji tsübua bilemtsüa akok, anungji kanga menungraa bilemra phone nung jembiteptsüla. Ano, iba ama mapang nung asenoki metettsüba kaji, asenoki tonga orr tangar dak nemeta sarasademtsünütsüa akok saka kokra sarasademi arung ta maja tashibo asenok sarasademja jajartemia tensa mapang meteta sarasademja mesenzüang tajungba. Kanga nüngdaka jaokra mesüra tanüla nung kar asoshi sarasademtsütsü kanga ajungshira, tonga maoyonga phone nung sarasademtsüdi ta Tsüngrem dang asüngdangtsüa akok. Akok nungbo tang tanurtem kaketrejui moi kidang amongba mapang tanurtem dang sobaliba otsü ashitsü aser Laishiba külemi zünga sarasadema amongtsü akok. Ibaji asen asoshibo tashidak meseni tashidak masü temoatsü bener arutsüba mapangang ka asütsü. Atangji, Coronavirus tashidak ya kanga tesashi saka kecha balaka tsübutsüa mali. Tanga tashidak ama asenoki kümdanga lira memenatsü aser menayonga mapang shitak nung mozü kidang anepalura jungadoker. Iba tashidak agi matongtsü atema teti mozü tzü agi teka shidoktsüla aser tzü ghonda nung pezübenbo ajemtsüla. Atangji, iba tashidak agi atong matong metettsüba kaji, ajungbena tango sashiba nung timtem adokra, yakta dang mozü kidang tendangdaktsütsüla. Iba amaji asenok ajaki pei kümdangkümdanga lira, iba tashidak mesen ya asen lima matongdang meshimeshia samar alitsü.