Pei Lima Asoshi

Aiben asenoki asen lima tenüng nung tajangzük agir saka asen lima asoshi asenokia kechi tajangzük agütsütsü tabo mebilemer. Iba amaji pei alidak yim aser town tenüng nung asenoki government nungi kechisa tajangzuk angutsü ali, itemjibo raktepa bushia agitsü saka asenoki asen alidak asen yim aser asenok town asoshibo tajung inyaktsütsüba nung shilem magir aser tenla agütsütsüa kanga nungnanger. Ibayongji, asenokbo ajunger saka asen limabo tamajungba akümer. Iba ama angatetter mangatet ama aliba tensa ka nung, tang Dimapur nung Dimapur Watsü Telongjemi (DWT) Dimapur yimti topur jungdaktsütsü asoshi City Clock Tower nungi tenzüka Tajen Ao Road ta ajaba lenmang nung naro tema anepalutsü tenzükbaji asenok ajak asoshi nümadangtsü aser tayongzükba mapa tajung ka asütsü. Atangji, asenok Aor Dimapur nung alirtem dang ‘na koyimer’?  ta asüngdangra, Dimapur nunger tabo shingaia mashitsü, saka ajaki pei tsürabur yim dang ashitsü. Idakji kecha taibo mali saka iba jagi Dimapur nung aliba yabo bendang lima nung alir amai bilemdaktsür. Ashiko, iba tangatetba jagi Aor dang masü saka tangar Naga kintemia Dimapur topur ajungtsü atemabo kecha balaka tenla agüja meinyaker asütsüa akok. Iba tangatetbaji melenshia kong lidir liaka asen alidakji asen lima ta bilema pei lima meimer akümtsübaji tongtibang lir. Aji oda, joko asenok Dimapur nung alirtemi Dimapur ya asen lima ta bilema Dimapur meimtsü aser Dimapur topur jungdaktsütsü asoshi mapa tilakabosa inyaktsü bilemtsüla. Tang tashibo asenoki Dimapur nung asen alidak Dimapur lenmang tilaba kümdaktsütsü, akok tashi asen agitsü kiojen yanglutsü aser asen kima oktenba jana agi Dimapur yimti yimdong kecha mapayui janatsütsü ta bilema inyaker amai inyaker. Item jakla aser inyakyim tamajung ajakji endoker, joko tang Dimapur nung aliba Aotsürtemi inyakba amaji, asenok kija aser lokti tentet shiai Dimapur topur ajungtsü asoshi mapa tilakabosa inyak tenzüktsüla. Joko tanü tensabo nisung kati mebilemdangi yimti yimdong nung kaket teshisa tilaka mesüra bottle tilaka endoka angu nunga asenoki jashia bilemtsüla. Ibaji dang masü yimti topur jungdaktsütsü asoshi garia junga meshidokibo bener mesenzütsü tashi tangatetba alitsüla. Iba amaji Dimapur nung DC office nungi shir office shia aser shishilembadak tesem ajak merüka ayuba dang masü saka süngdonglidong aser naro agi topur jungdakja ayutsübaji ajak shisatsü nung alitsüla. Joko, Dimapur nung kiyong shia tanurtem, aiür asangur aser tantsür tamburtem asayatepa aser mapang endoka otsü atonga kazüdak park tajung kakabo akatsüla. Itemji government kimong agi akümtsüa akok. Iba amaji yimti ajungtsüsa aser nübortem anisüngzüktsüsa lokti tentet ajaki Dimapur nung mapa kaka inyaka toktsü nungbo Dimapur ya ajak atema mulung anisüngzüka pelapelaa senzüdak aser amongdak tesem tajung ka akümtsü. Tanü Dimapur nung Aotsürtemi inyakba amaji kodang asenoki asenok dang masü saka asen lima aser asen yimti nung alir ajak topur ajungtsüsa aser nümadangtettsüsa mapa tajung ka inyakdir, iba jagi asenok nem asen alidak yimti madak kibur kümküma alitsüsa tesadem aser tasütait shisatsü agütsütsü aser tangaria asen tali akümtsübutsü. Iba kasaji kodang asenoki asen alidak ajak asoshi mapa tajung ka inyaktsü tenzükdir, iba anogo nung jagi aseni asen alidak yimti tali meima akümtsü. Joko asenoka asen alidak Dimapur nung  khen atema lendang semtu nung anenzük amai bilema melii Dimapur ajungtsü asoshi tenla agütsü tenzüktsüla. Asen yim tenüng nung asenoki tajangzükbo aginür saka yim ajungtsü atemabo kecha meinyaktsür ta asüba ama, Dimapur nung lia takar akümer saka Dimapur ajungtsü asoshibo kecha meinyaker ta asübaji asenoka asen shilem nung tuluka mabensa aser tamakok asütsü. Joko, tang nungibo talisa Aotsür Aoer lokti tentet ajaki jubilee amongba tenüng nung danga Dimapur yimti topur ajungtsüsa mesüra Dimapur nung alirtem teyari angati  angutsüsa mapa tajung langka dang inyaka toktsüra, Dimapur ya shitakba asen lima küma anepalutettsü aser idangjiang asenoki Dimapur nunger-a ta nümadangdanga shitettsü.