Pei linük meimtsüla aser akhümtsübutep alitsüla: Tir Pranab

New Delhi, February 24 (Agencies): Linük Tir, Pranab Mukherjee-i, lokti temeyoktep aika aliba linük nung lokti ajak tsüngda akhümtsübutep alitsüla, ajak aria meimtsüla aser linük meimtsüla, ibaji India yangerba tamendakdak lir, ta metetdaktsü.
New Delhi nung IGNOU aser Bhartiya Shikshan Mandal-i ayongzükba Bharat Bodh, sentong nung jembidang Tiri, “Bharat tangatetbaji asen sobaliba takar nungi anguba shisatsü lir. Asen linük yangerba tangatetba tajungtemji tanüa tapet, iba nungji pei tetsü tasoli meimba, pei teinyaktsü mapa inyakba, ajak aria meimba, lokti balala tsüngda akhümtsübutep, ochishia aliba aser peisasa tazüokba nung aliba densema lir,” ta ashi.
Iba Conference ajanga shisashirtem aser bushisüngdangertem külemi longjemdaktsür, ta shia iba mongdang ayongzükba atema Pranab-i IGNOU aser Mandal na nem tenüngsang agütsü.
Tirisa, “Khenkhenbo ni asenok lokti temeyoktep aika külemi litetba ya süngmanga bilemer. Yimsüsüba ka, wako ka aser Temzüng ka kübok oshi 200, oshioben 1,800, alima nung tongti tamangba yimsü tenet aser telok balala aika liteter,” ta ashi.
Tiri ashiba agi, India nunger nüjiso ngur sülen rongsenkettsüng nung kanga renlokogo, aser anogo asemnü Conference ya ajanga linük ajangzüktsü imlar.
Iba sentong nung Human Resource Development Minister, Prakash Javadekar den RSS tongti lenir aika aden.