Pei Mobile Number ji Aadhaar den sendakteptsüla: UIDAI

New Delhi, August 01 (Agencies): Tanü Unique Identification Authority of India (UIDAI)-i nüburtem dang, sorkar indang service balala online ajanga angutsü atema pei indang mobile number ji Aadhaar nung update asütsüla, ta metetdaktsüogo.
“Nüburtemi pei indang Aadhaar amshia pei kidang mener mesüra parnok aliba tesem mashii nungi ayongayonga sorkar indang service balala online ajanga angutsü,” ta UIDAI CEO, Ajay Bhushan Pandey-i sangdong ka ajanga ashi.
“Aadhaar-based OTP (one-time password) identification ajanga nüburtemi item service balala online ajanga kecha tetsükdaktsü makai angutsü,” ta pai ashi.
“Aadhar tenüng züluokba mapang shirnoki pei mobile number magütsü, parnoki register mesüra update asütsüla, koba ajanga tajungba nung tongteprateptettsü aser sorkar services melamela angutsü,” ta kasa sangdong nung shia lir.
“Item ama services online ajanga angutsü atema Aadhaar-based OTP authentication amshir, nisungtemi pa/la indang mobile number ji Aadhaar nung züluoktsüla. Nisungtemi mobile number register mesüra update asütsü atema pei alidak permanent enrolment centres-i aotsü akok,” ta UIDAI sangdong nungsa shia lir.