Pei oshi ya pei kin ka ayak lir

–  Talitemjen Imchen.

Medemer Tiatoshi Longkümer Kohima-i “Aor Ajaki Chungli Oshi Angazükdi” ta kentet yur ocet 21st Sept. 2018 nü züluba ji, pei oshi ya ajak asoshi kanga tongtipang lir ta pei oshi tongtipang agüjaa jembitsü ajungshitepba nungji nia semloker. Kechiaser oshi ka jagi pei kin ayak jangjatsür. Tsürabur mapangtembo teptsü atep. Iba jagi Ao kin asoshi ayak ana liasü. saka tanü putu nungbo teptsü mateper ji, Ao kin asoshi ayak ka dang lir. Mapang kabo yimtsüng shia oshi balala jembia aliba ya samaa aotsü. Tia mekara Ao shi yaa samatsü ana nung lir. Kodang oshi ka samadir item kin asoshi, pei sobaliba ajak sama den sako lir. Aor ajaki kibong nung Ao oshi jembitsüla.
Ni lanuwa mapangbo, Chungli aser Mongsen oshi ta dang angashir liasü. Saka kodang ni tain küma Mokokchung-i aru aser tesem balala nung senzütsü tenzük, Changki oshi angashi. Nokpur oshi angashi aser Chungli & Mongsen oshi ji angashi. Kodang ni Ao oshi nung kaket zülutsü tenzük, item ajak jembiba nungi agiteter meyoktepa jembiba aser züluba arok (common) Ao oshi ka liasü. Ak tepseter temesang indokdang tawazürtem-i koba tashi ka nung nok yoker, ajak ji temesang ajar. Aser indoka akaba nungji, terepranger kar-i yabo tar tajung ta amshira alima-i menütsür ama, asenok-i Ao oshi ji shisadanga ora, koba tashi ka Chungli o aser koba tashi ka Mongsen o mesüra koba tashi ka temeyoktep oshiar, shingaia benteta meshitettsü. Kechiaser asenok ji talangka külem-i meyoktepa arur aser kasa dang lir.
Yim shia oshi ka ka lir, yim kar nung oshi ana jembir. Ano yim akümdang, Aor yim timba ka kidong tabensa bushia akümba yimtem lir. Saka yimti nung putu menden aser pei kidong tenüng nung yimti asoshi nüktang küma noktaktsü, yim ajak sobaliba lir. Item yim khuret tulu tongzüktsü netsüng aika nüngdaker. Saka kidong tilatem asoshi tebilemtsü arur. Parnok netsüng tera dang süaka, pei yimti nungsa yimkümer süa linür. Mesüaka pei taso lima doktsür moner, aiako den külem-i linüdang, netsüng ishikapurtembo kidong melenshiba angutsü. Ano karbo yimküm dang nungi kidong tulu nung metaloker arur kidongtema otsü lir. Yamaji Aor yim aika sobalirua arua lir. Aser tanübo shir yim-i na/ner/ozü kibong oa lidir par yimer oshi jembia tanur ji intetba asangsang nung asen-i angur. Iba jagi tsürabur, “Tzü nung jemsemer” ta jembia aru.
Tang asenok-i telok tentet balala nung jembiba aser osang kaket balala nung zülur azüngba oshioben (literature) ya yim shinga dena putepa mali. Nai yabo Mongsen o ta bilemer doktsüba olong ka ji, ner kidanger yim nungbo ya Chungli o tarok ta jembidar. Yamaji Mongsen nungbaia ya Mongsen o tarok ta bilema jembidar. Tatishitsü agi, Longsa nunger-i jembiba ji ajakbo tanga yimer-i mangateter. Ungma-i Mongsen oshi aika inoker jembir. Sürapang Ungma-i Mongsen oshi inoker jembir asü, par yimer oshi jia balaka? Langpangkong aser Asetkong-i jembiba nung “S” kangabo mesapur, “H” ang sapur. Saka Ao oshi nung S agi tasüng lir. Changki oshi tongtipangsa yim pezü-i jembia aliba ji aikati mangazükteter. Mesüra Chungtia, Mangmetong nunger-i jembiba ji aikati mangateter. Ano tanga yimer ka asoshi yim telongtet nung aliba nisung ana jembiba indang angatettsü kanga tasak. Ni tawa to Changtongya nunger ana jembiba angashi. Tena peronglai tashi agi dang jembi saka kechi otsü tenzüka kechi nung atemerar nibo kata mangatet. Saka tenati kü den jembidangbo, Ao oshi agi jembi aser ozü asem kanga pelatep. Yamaji yim shinga dena putepa mali aser tsükong shinga oshi putepa mali. Saka tang koba osang kaket asenoki azünger mesüra teloktesen nung jembir, ibaibo ajaki angateter aser züluteter. Aor ajaki angateta jembiba aser zülutetba dang ji AO OSHI ta ajar.
Saka ni tanü iba ocet nung shinüba yabo, temalen tezülusang-i kobala nükjidong nung rangloker züluar ni memetet. Saka kodang onok, nenok, parnok, Chungli, Mongsen ta amshidir telemsa (ism) oadoker. Asenok-i yongtsü nung “ism” ya moli. Alima nung shibaibo pei meyong mekümnütsü mesüra maginütsü? Ya ozü kidong indang, ya par kidong indang, ya onok Chungli oshi, ya onok Mongsen oshi amala (etc). Iba yagi alima dang tali rajang kümdaktsür. Mongsener-i long nung mapoka ta asünung, Chunglir-i ajak long nung apok ta aginer. Mongsen-i nenok Chunglir long nung apok ji, kima long ajak ya nenok tebou lir ta lutsüdangbo maginer. Asenok ajak dak tashi mait ka ji, anasa aliba kiyonger, kidang aser medemer asoshi kechi tako o lir mesüra kechi parnok-i maginer, item ji tama jembitsü meranger. Iba jagi asenok yongtsü nung telongjem luladaktsür aser temeim chimia mekongdaktsür. Alimar yimya agi kodang ni/nai o agi medemsang/medemla yirutsür yokdir tanabenbo majurutepner mesüra na/ni malidang pa/lai ne nüngsena jembitsütsü menua maka.
Aor ajak meyokteper tangar tejaklen-i aoba jangjaa mangur. Aortema joko onok, ozü aser ner olongtem ya osep nung mamatsü asoshi dang yudi. Asenok ajak melenshidi aser asenok meyong, arok meyong ta külemi, pei pei tashi yari tsüngmetemdi. Tepong ka küma langtepdi aser tejaklen repranga Ao kin noktakdi ta temalen medemsang onük nung yarisema ayonger.