Pei tetsü tasoli asoshi

Tongpang nung nokdaktsüba nübo aser anüng, ali aser tzüyim nung raratsüba tayimtsü, rong aser raraba hadir akaba nung Russia o Ukraine na medemdangteptsüla masü, anüng o ali na, Russia noklangben agia tashi taitba saka Ukraine tir Wb.Volodymyr Zelensky-i anir Ukraine nunger tetsür teburtem tongpang nung tasü itta nokdakbaji asenok asoshia tayongzükba tuluka asütsü. Russia-i parnok meyong tayimtsü aser rong aika raksatsüogo aser sepaitem alidak tesem aika makdoktsüogo aser joko Ukraine yimtiba Kyiv aser Kharkiv yimtitem tashi Russia sepaitemi atsünga aita par yimti yimdong nung tsükchirtem den  khateper, ajisüaka Ukraine tir Zelensky-i Russia tsüngdang mapudaker aser par lima toktsür-a mao ser, pa-ang arürkhudong kümer tongpang nung nokdaka lir. Iba jagi paji rongsen aser yimsüsüba menden penbuba yimsüsür aser tanishir masü saka pei tasoli meimba senso ta jangjar. Pai pei tetsü taso lima asoshi pa taküm agütsütsü mulunga lir. Atangji, pai NATO telongjem nung dena aliba US aser tanga kintem nungi Russia-i injang yok meyok ka jet ta aruagi pa pu asemtsü ta bilem, saka NATO nung aliba kintemi Russia den rongsen lenmang nung pilaba dak alaka shingaia teka meyitet. Iba ama takok angutsü teimla maliba tongpang ka nung nokdaka lia, US-i Zelensky dang Ukraine toktsür US-i arutsü atema tayimtsü yokdi ta ashidang, “ ni tang tayimtsü nung kazüa senzüdang masü, saka nenokang aruagi yaridaktsüner,” ta ashiba o ji pei taküm aser kibong dang nungibo pei tetsü tasolima temeimba meimba shisatsü atenba mulungjang nungi adokba teburchi o ka liasü. Ashiko, asenokibo US-i ashi mashi ka, asen nübortem toktsür kibong ajak anir US nungjiang oa jenokla. Tang Israel nungertemi tiyongi irr jembitsüba agi, Russia o Ukraine na Belarus arrtsülen ajurutepa yimjung ken o süoka jembidagi, ajisüaka Putin o Zelensky na pronglai telemtetba tajung kati arutsübo meimlar, anungji tenapronglai pei sepaitem dang tensa tamajungba ka asoshiang renema atatsü metetdakja lir. Atangji, Ukraine nungertem ya pei tetsü tasoli meimba nübortem lir, ibayongjiang par sepai katibo pei mang agi bomb kümer Russia nunger nokdangtsü atema apu ka nung nokdaka yur apuji pa mang agi poksadaktsü. Nisung kati iba tashijiang pei tasoli asoshi pei taküm bendanga agütsütettsü.Itemji dang masü saka ano asenok asoshi pei tetsü tasoli asoshi bendanga agüja inyaktsü atema angazüktsüsa tang Ukraine nung atalokba kaji, Russia nungertemi yimti tashi tonga aruagi makyonga aruba agi tetsübu nung nübortem meyirijang aika pei ki toktsür kidanger limatem nung tejenokdak bushia jena aoba mapang ka, Ukraine nunger tanga limatem alir aika pei lima asoshi raraba tongpang nung shilem agitsü asoshi meyipa arur. Item rongnungji teburtem dang masü saka tetsürtema aika lir. Parnoki tasütsü metsübur saka pei lima asoshi asütsübajiang jangratema bilemer. Ukraine kidanger Poland lima artsü nung süngküm anüker sepaitemi ashiba agi, Russia-i Ukraine amaktsü tenzükli nungi Ukraine nunger tanga limatem nung alirtem pei tasoli asoshi raratsü atema Poland arrtsü tonga arurtem meyirijang 22 shi liasü aser ano aika tarensena nokdaker par limai ayaoka aitsüba purtem liasü. Item jagi, “ozü lima asoshi onoki merarara shirnoki raratsütsü,” ta shia pei lima bushia aoer. Item denji asenok nübortem madak yimsüsür, ketdangser aser linük tenzükertem jakla aser mapatem medemdangra, kanga bilemdangtsüsa adoker. Asenoka yamai pei tetsü tasoli tenzükba tenüng atemer, pei agitsü rongsensa rongsen bendena alidang, tangar tsükchirtemi asen lima makyonga arununga koma süla (?) ta bilemdangdi. Ashiko, asenokibo tsükchirtemi injang yok meyok ka teka mekangtsü südi ta bilemer, kechiyong asenokibo asen tetsü tasoli akhüm aser temeten dang nungibo rongsen temeimba meimer. Tanü putu nung asen tetsü tasoli nung nübortem asoshi inyakba tenüng atemer asenoki tashiyim agi saru saruba yagi, commission agiba yagi aser percentage meshiba yagi, shitakba tsükchir ket nungi asen lima kümzüktettsü na (?) ta asensasa shisadangtsüba mapangji tang ya lir.