Pei yim anepalur

Dimapur town nung amai sentaktepa lir saka Municipal area kübok masü saka yimtsüng jenjang nung aliba tesem aika Dimapur town temeket nung lir. Item rongnung Signal Angami yim ya ka asütsü. Akhidang, armytem signal agütsüba tesem nung Angami nungertem tama arua aliba agi, iba tesem dang Signal Angami ta jatsüba tanü tashi amshia arur. Ashiko lanur tendakbo iba tenüngjia Naga nunger oshi agia melentsü südi. Iba yimtak Aor kibong noklang pongo dak tali lir aser yamaji yimtsüng telongtet nung akaba li tasazük tulubalenka Aor meyong kümogo. Ano, Angami nunger yimküm asünungji village council nunga Angami nungertem dak alaka tangar Naga kintembo shilem magidaktsüi aruba taküm 2017 küm nungi tenzüka Aortem dang masü saka tanga Naga kintema village council nunga züngsemogo aser goanbora-a mepu shia shimogo. Iba amaji Tsüngremi Aotsür Aor alidak yimten aser lokti nung kibur küma shilem agitsüsa maongka agütsüba angur aser metetter. Iba maongkaji asenok asoshi khuret lir. Kong südirsüaka, talisa tangar pur bendangertem den külemi lisemba tesem nung, asenoki inyakba ajak nung tatishitsü tajung küma inyaka sayutsübaji kanga tongtibang aser iba amaji inyaktsü aser alitsü tangari asenok dak imlar. Iba tangatetba nung Dimapur nung Signal Angami yimtak alir Aortemi yimtsüng nung lenmang raksar aliba anepalutsü aser janaona mashi mashi yim janaa meindoki jungjunga bendena endoktsü lemtetogo. Iba telemtetba kisüng jagi Aotsür Aor ajak nümadangdaktsür aser kodang parnoki lemtetba ama mapa küma inyaka odir, ibaji yimtaklirtem ajak asoshi tatishitsü tajung asütsü. Asenok town nung alitsüa akok mesüra yimtakang alitsüa akok, kong lidir liang, asenok kija ajungtsü aser merüktsü atema dang masü saka asen alidak temeket, asen yim aser asen town ajunga junga ayutsü bilema asenoki shisatsü, nübo aser rongsen tenla agütsütsübaji nüngdaker. Aji oda, kong lidir liang, Aotsür Aortem alidakbo metetmeteta temerük, tesadem, tesüngjem aser topur jungjunger asütsüla. Iba amaji Aotsür Aor alidak tesem aika nung angur. Ajisüaka, ano tesem aika nung Aotsür Aortem alidaksa memerükba, gari lenmanga temesüba aser tebenjaba angur. Ibayongji, nisung karibo Aotsür Aor alidakbo janaona mashimashi endoker aser ali jenjanga Aotsür Aortemisa temetetba amato yimkong jajatsü asoshia lenmang sadema melapoktsüli asür ta jembir. Ibaji tanganütsü maket saka ibaji shitak asü masüar ta reprangdangyonga odangra tesem aika nung pi jembiba amaji shitak angur. Ibaji asenok ajak asoshi taaktsüka lir. Naga nunger asoshi Aotsür Aortemi taküm, nübo, shisatsü aser rongsen tenlaba amato tangar aikati tenlaa malitsü. Item tenlatem jagi Naga nunger aika tajung kümdaktsüogo. Item timtem aser tenla jagi temoatsü aküm aser temoatsü jagi maongka aküm ta Aotsür Aor tesem aika nung Tsüngremi moatsüogo. Item temoatsü aser maongkatemji ali tilaka yim lenmang asoshi magütsünü dang menentsüsa asenok malitsüla. Aji oda, Aotsür Aortemsa temerükba aser tajungba ta tangari akümtsübua jembia alibato asenoki asen kima dena merüka meyutetba agi mesüra tangar kima oagi polythene tilaka nung jana seper endokba agi menentsüsa asenoki meinyaktsüla. Asenoka yimtsüng nung aser town nung yimer aser kiyongertem den alir asünungji, asen libaliro aser inyakyim agi tangar pelatsüsa aser asen alidak temeket ajak topur junga alitsüsa asenoki temulung tesadem aser tangatetba tajung agi inyaktsüla. Atangji, Mokokchung district nung aliba yimtsüngtem ajak temerük aser topur junga ayur. Iba amaji Dimapur aser temeket nung Aotsür Aor alidak aser Aor yim aika topur jungjunga aser merükmerüka angur. Ajisüaka, ano asenoki khen ali tonga lur tangari asenok akümtsübutsüsa inyaktsüba mapa aser tesem aika lir. Item rongnung asen alidak yimkong lenmang asoshi ali mekurui agütsütsüba aser merüka ayutsübaji mapa tilaka amato saka kanga tongtibang asütsü.