Peisasa azüoka litetba yimsüsür

Nagaland tatar senden nung tenetben tashi tatar yimsüsür asütsüsa nübortemi shimtetba yimten yimsüsür, asür Wb.T.Sentichuba taküm aser mapaji atamata masü. Iba ama takokjibo noklang nung ka anati dang ngutettsü. Iba tashiji nübortem nungi mulunglemtet maongka tulu ngua yimsü sür-ang, ano taküm arishia küm 80 dak tali alitsüsa moatsüba takümji jangratemtsüka lir. Ibaji dang masü saka teshiranga meshirang aser temang nung tangu-tayangba kecha mali, shinga timmedemdaktsüi alima nungi pilabaji Kibuba nungi taochi aser temoatsü kanga tuluka nguogo ta bilemer. Nisung asünungji Wb.T.Sentichuba dak tashimait aika liasü südi. Ajisüaka, pa dak tashimait jakla alibatem dang nungibo tashi aitba jaklatemang teimba liasü. Pa ya lanur asüba mapang nungi kanga meranga inyakba nisung liasü. Pa yaritsüsa kinunger tajung liaka pai kodanga parnok dak dang nendaker mapa meinyaki mali asü. Aji oda, pai pasasa yaria class 16 tashi azüng aser pa ket nung rongsen meliaka nübortemi pa dak temulung lemtetba agi, iba tashiji bener Angetyongpang assembly constituency nungi terokben-tenetben tashi adoka tatar senden nung mena kilonser tazüngpur (Cabinet) menden tashi nung menogo. Wb.Sentichuba dak aketba tajung aika rongnung kaji paji nübortem meimba nisung liasü. Pai nübortem agi malak aser parnok ajurua sensaksema amentsü teti yongyaa liasü. Ibayongji, nübortem nüngdak pai reprangteta yari aser parnok tejashi aser tepela anogo nung pa parnok den teti liasü. Wb.Sentichubai pa züngsema aliba lokti senden nung teti aden. Pa koba tashi uludir uluaka, pa atema aji tongtibang masü saka pa adenba loktijiang tongtibangtiba, anungji pa tenüng jateta lokti sentong nung shilem agitsü meinoktsüyonga mesüra shilem agi matatsüyonga, pai par teloka ta kanga junga züngshia senden metenzükdangyongi jelia pa tama mener ata. Iba jagi Aor senso telongjem tulutiba nungi tilatiba tashi pa züngsem alidakbo senden kata mayoktsüi dena aruogo. Sendeni aruyonga nüngdak madokra kecha mejembitsüa akok saka pa arubaji lokti asoshi akhüm tulu liasü. Aji oda, asür Wb.T.Sentichubaji lokti asoshi shisatsü angudak len teyur tajung ka liasü. Pai kodanga mashi ain madok, saka yimten mapa aser saisapong nung kodangsa tamakok ngudir, idangjiang ajemalushir pai tamakok anguba tensa mapangji kokteta liasü. Aji oda, pa dak aketba jakla aser tashi tulutibaji peisasa azüoka ochishia litetba jakla liasü. Nagaland nung yimsüsürtem aikati yi ajemer, nüktapangtar aser das asayar, ajisüaka, pai kodanga item mapa anasai mao. Pai moko sali dena machi arem. Aji oda, asen Naga lima ochimashi, nüktapangtatepba aser chiajema japujaritepba mapatem agi sünger liaka, item alima temenentem nemji mekongshidaktsüi pai pa taküm shitak azüoka yutetba tashi aser tangatetbaji kanga ulurua liasü. Aji oda, asenok asoshi pai toktsüba senmangtemji ali, kiojen aser sen masü saka meranga inyakba, peisasa pei taküm azüoka ochishia litetba aser Tsüngrem akümtsübua aonung sentep nunga dena Tsüngrem külema aruba ajemalu shisatsü, tangatetba mapatemji asütsü. Asür Wb.T.Sentichuba nükjidong mesüra tebilemba aika mali asü, saka pai yimten mapa shitak inyaknüba tangatetba liasü. Pai Naga nunger putepa lidaktsünü, iba jagi Naga lima yimjung asoshi teti jembi aser pai kechi tim ta angatet, idakji zep ta ammeter tasü itta jembi aser nüngsena agitet. Wb.T.Sentichubai pa MLA kümnüba agi anemsü agi kodanga nübortem dang meima mebenshi saka nübortem asoshi inyaktsübaji pa mulungsentsü nung shitakba keta liasü. Iba jagi nübortem mangyim jashi, tamakok aser timtem anguba mapang parnok den külemi mangyim jashi lemsatepa among aser nübortem pelatepba nü külemi pelatep. Lokti, yimten aser arogo asoshi kodangsa teinyaktsü nüngdak reprangtetdir, pai pasasa mulungteta inyak. Paji mulungso, alima aser pei nübortem meimba yimsüsür tajung ka liasü. Pai nübortem dang masü saka kinungtsü aser par chinurtema shiktakba meim aser aibelen mesüi Tsüngrem den alitsü len sayu. Tanü pa asenok den taküm meliaka, pai yutsüba senmangtem amangertem küma ochi jembitsü aser inyaktsü aser peisasa azüoka litetba taküm kaka asütsü merangdi. Tanü Naga lima nung pa ama yi majemer, Sali moko machir, nüktapangtaa mesenzür aser ochishia alitsü meranger yimsüsürtem agi anünga lir. Ibaji tanü Nagaland asoshi tayongzükba tulu asütsü. Iba tayongzükbaji lanurtemi langzütsüla.