PEISASA AZÜOKBA (T.KEN 38:1-22)

 

“Aser temetetba nung peisasa azüokba, peisasa azüokba nung taremzükba, taremzükba nung temeshiba, temeshiba nung adianu temeimtep, aser adianu temeimtep nung temeim bendenlokang” (2Peter 1:6,7).

16th Century Bishopi ashi, “Peisasa azüokbaji ter nung tuku lir!” Abraham Lincolni ashi, “Tamajung rongnung mazüokbaji tulutiba- tulutiba rongnung ka mesüra.” Solomon Chubai tekümdangtsü agütsür, “Shibaisa pei tanela mazüokteter, pa teraksa aser jara maketba yimti ka mesük” (A.Shin 25:28). Mit mazüoktetbaji tebur tamajung temenen süngjang ka lir. Ibai tsünüi shi achitsü jangraba ama lir. Khristai dang asenok mit yanglushitsütsü akok. Tazüokbaji tamajung tebilemba, o aser mapa sotba.

Tasen Lai nung, “Ain adokang, aser tai temena” ta ashir (Ef.4:26). Ibai yamai angatettsü akok, ibai asüküm aser mit tamajung nungi adokba masü ta jangjaang. Ain adoka kodanga yipteni tuo- temenen nem iba ama tetsüng ajemmetdak tagütsü.

Tazüokba indang jembidang temüli azüokbaji mezüngbuba lir. “Asenok ajaki aibelen asür, saka shirnoki temeli azüoktetter parnoki tanga lemang nunga azüoktettsü (Yakob 3:2).” Solomoni ashir, “O nung tekara nisung ka nai ngualima? Pa tang nungi tamashir ka teimla taoba” (A.Shin 29:20).

Tai bushitepba aser o tutepa senzübaji arogo nung wara tamajungba lir. Asenoki ya mapitetter- asen tamajungtiba nung tajung aika lir, aser asen tajungtiba nung tamajung aika lir.

Tamajung jembir dang asenoki kechi ashir aser atalaba jagi asenok kechi koma Khristan ka ta asadanger. Dawidi ashi, “Saka ni tenarong tajak, nisung ama mangashir… Aji mesüra parnoki kü madak pelatsü. Kodang kü tetsüng ajudokdir parnoki ni anema tulu shisangtsü” (T.Ken 38:13-16). Kodang Shimei Dawid atakatem, Dawid sepoy rongnung kati Shimei kolakji leptoktsüdi ta ashi. Saka Dawidi pa sotta ashi, “Kibubai pa dang ni atakatemtsü shia lira, pa anendaktsütsü ni Shiba?”

Tatem anogo nung tazüokba makai temenen jembir jenti adoktsü (2Tim 3:36). Asenoki asen mit azüoka lidi. Shinga tabensaba mali. Asenoki aibilena tsük tajung den sangremer tsük den intoktsü akok. Anogoji ataa lidi! (Mt. 13:24-30; 1Kor. 4:5).

Oba, ni kü tebang temüli azüoktsü Ne o kü mulung nung talubusa mungdakjang. Amen.