Pela aliba tetsü kati tepela kibong ka yangerteter:Sonali Bendre

Mumbai, Sept. 01, 2016 : Actress Sonali Bendre-i la film nung tanaben shilem agitsübaji tetetzü balaka asütsü amai bilemer.
“Tang tashi nung kü dak film nung tanaben shilem agitsü atema tejangraba mesüra tajungshiba kecha mali…tanaben meyipa oa film nung shilem agitsüba tsütsü nisung ajak atema tebilemba balala lir. Ni kecha nunga miimbanger mali saka ajaki angudak dang alir,” ta ‘Oriflame’ oset ka sayaba sentong ka nung ashi.
“Shingaia Television nung shilem kangabo magiba mapang ni ‘Sarfarosh’ aser ‘Hum Saath Saath Hain’ nung shilem agiogo. Anungji nisung kati inyakba mapa mesüra shiangia inyaker meinyaker ta asübaji tongtibang masü. Ni teti ni jangraba mapatem ang inyaka arur,” ta lai shisem.
Arishi küm 41 tain, Sonali-i, “Ni Maharashtra nunger middle class kibong nungi lir aser kibong nungi shinga film tsütsü tesentaktepa mali. Anungji ni film industry nung shilem agiba ya taoksatsü ka amai lir, ajisüaka ni atema ibaji ano jangratemtsüka lir kechiyong ni anünga aliba ozü kinungertem sülen anidaker ka masü aser ni kodang film nung shilem aginüa bilemdir agitsü. Film script koba agi ni ajungmesodir iba nungji ni shilem agitsü,” ta ashi.
Sonali-i mapa meinyaker tanur tetsütem dang meteta alitsü tapu asem yamai lemsateper: “Ketsü kecha meinyaker asüji teti kidang dang liasü, ibaji ajanga ni kinungtsü ka ta asübaji kanga akhümtsübur. Kidang kinungtsü ka mapaji mapa ajak danga tasaktiba lir. Ajisüaka tetsütemi pei temang anepalutsü atema mapang tatsüka agitettsü nüngdak kechiba süra ibaji kanga tongtibang lir. Pei sasa pei anepaluba nung tepela lir. Pela aliba tetsü kati tepela kibong ka yangerteter.”