Pelashishia Agütsüba

Nenoki kü dang Tesayur aser Kibuba ta ajar aser nenoki tim ajar kechiaser aji ni. Yohan 13:13
Asen Kibubai kodanga asenok dak tashi mamshi. “Nenoki Kü nem agütsütsüla” ta Pai kodanga mashi. Masü, shimtsü asoshi Pai asenok nem shimtsü nüji agütsü- kanga nüji, asenoki Pa tejak nung metsü metsüloktsütsü akok mesüra Pa südaktsütsü akok, tangari inyakba ama asenoki inyaktsü akok, aser Pai kodanga o kata mejembi. Saka kodang Pa taküm kü taküm nung Pa alangzükba mapa ajanga sodaktsü, kü taküm nung Pa tashi tematiba nung agizük. Ibai tabensa ramoka ayuba koba ni “ozü Kibuba Tsüngrem, nasa sentsüwangshi aser tetushi, aser ain angutsü tetemsü” tenangzükba agütsür. (J. Adok 4:11).
Asen Kibubai asenok nungi tashi angaba khangra Pa mapa master ka dang akümer, aser shidakba tashiji makai akümtsü. Pai kodanga tashi angaba makhanger, saka asenoki Pa shidakba ajurudir tejangja asenoki Pa dang tashi angatsü. Idangji mela-mela Pa asen taküm nung Kibur akümtsü, aser asenoki anepdang nungi aonung tashi Pa külema alitsü. Pa dang tashi angaba ajanga asenoki taochi nung ainba jenjangji sayutsü. Alima temenen nungi pilaa asenoki tashi angabaji temaba jenjang nung ayutsü. Tashi angaba jagi dang kasa alir rongnung tesendaktepji tebu aser techir tsüngda tesendaktep ama alitsü, master aser kilir tsüngda ama masü. Yisui iba tesendaktep indang jembi, “Ni aser kü Bu ka dang” (Yn. 10:30). Pa Techir saka timtem ajanga Pai tashi angaba angazük (Ibri 5:8). Tashi angaba ajanga Pa Tekümzüker aküm.
Nü nem bendanga agütsübaji kü maongka lir, kü Tsüngrem, kü Kümtetdakba. Ni pelaseta kü taküm Nai mulungba nung agütsür.