Pelatepdak denang !

Tsüngrem taginübaji asenok nisungtem temenen nung sür alibatem dena shia arudaktsüner. Idangji Pa pelar. Aji oda, kodang nisungtem temulung meyipa Pa dangi meyipa arur, idangji Tsüngrem kanga pelar. Iba kasa mulungjangji asenok daka lira, kodang temenen pur ka temulung meyipa arudir, idangji asenoka kanga pelatsü. Yisui temadokba chir ka indang o entepba ka ashiba asenoki Luke 15 nung angutsü. Iba otsü nung tebu o temadokba na chirjia tongtibang saka ano jabaso tambusang taküm aser jaklajia asenok asoshi kanga tongtibang lir. Ibayongji, iba o entepba otsü nungi tanü asenok den tanüla chiyongtsü ka lemsatepner. Tenu tanubusangi tebu dang nungi pa senmang ajak lemzüka bener aoba ajanga tebu jashibaji jabaso tambusangi angateta lir, iba jagi paibo tebu peladaktsütsü meranga küm aika tebu den lia pai ashia angaa yaritepa ali. Ajisüaka, kodang tenu tanubusang temulung meyiper tebu dangi taidok meshii aru, paibo tenuji pelaa magizük. Pelaa agizüktsü melen tejashiang kanga jashia liasü. Aji oda, tebui tanubusang meyipa arubaji agizüka pelashishia sayuba jagi jabaso tambusangjibo tejashiang jashidaktsü, kechiyong pai pa atema dang bilem aser tebui tanubusangji arütsür pa asangtsü ta bilem südi. Aji oda, tenu taküm mesamai kidangi taidok meshia meyipa aruba asoshiji pai pelaa mebilemba agi tebui tenu kidangi meyipa aruba atema tepela benjong ayongzüka pelatepba nungji paibo shilem magitet. Iba otsü nung tesasatsüji aji ka asütsü. Atangji, nisungertem yimya nung aji keta lir. Ibaji pei ajung asaba aser tangar dak tenük meremba nungi adoker. Iba kasaji asenok aika Tsüngrem tenzükba mapa nung mapang talangka anibelema inyakdar asütsüa akok. Atangji, aseni inyakba yari kenü Tsüngrem tsüngdang asenok sempet angutsü tenangzükba alinungji, iba teimla nung asenoki inyaker. Ajisüaka, asenoki kodang asenokiang Tsüngrem tenzüker amai bilemdir aser asen jakdang Tsüngremi tangar moatsüba anema tenük meremdir, asenoki iba temoatsü nung Tsüngrem den pelateptsü melen  asenok mepelatetter. Iba ama temenen agi kangshiba pur asenok aika lir. Aji oda, mapabo aseni dang inyaker saka Tsüngremi temoatsübo tangar dang moatsür ta asenoki bilema asenok jashia aiter. Iba jagi asenok temang nunga tashidak akümer. Tsüngrembo tenzüker saka ibaji ita sen asoshi dang tenzüker ama mesüra yimya sübaba mapa ka amato bilema inyakba ajanga asenoki aiben asenoki tangar dak tenük meremer. Ashi, asenoki shitakba Tsüngrem temeim angatetba Tsüngrem tenzükra tamajung nisung ka tajung küma temulung meyipdang asenok tepelaba asütsü. Kechi mapa nung südir süang, asenoki asen kija ajungtsü asoshi bilema masü saka tangar jungdaktsütsü asoshi bilema meinyak tashi Tsüngrem temeim agi tangar dak mapa inyakbaji asenok asoshibo temulung yirutsüba mapa ka dang asütsü. Alima nung tia tamajungtibaji item purtemji lir. Kodangsa Tsüngremi pelatsüsa mapa ka atalokdir, idakji asen dena pelateptsüsa asen dak tanüla tangatetbaji alitsüla. Tsüngrem pelaba mapa ka nung asenok mepelatetra, ibaji asenok asoshi tebilemtsü tuluka asütsü. Arogo nung dang masü saka yimten, lokti aser business mapa nung asütsüa akok, kechi mapa nung südir süang akok tashi Tsüngrem tenzüktsü aser Pa den pelateptsübaji asen mapa asütsüla.