Pele’er takok marok Pound sen 400,000 yong ayok

London, June 09 (Agencies): Brazil nunger football asayar mongin, Pele nem agütsüba World Cup takok marok mesükba takok marok ka pound sen 395,000 yong yokogo.

US kübok Los Angeles nung tentetba auction telok, Julein’s Auctions-i London nung ayonga agiba sen timba agütsür dang osettsüset ayokba sentong nung Pele-i taoba mapang agizükba sempet aser pai asemba süoshi o tsüngsemtem yokshiba osang jangjaogo.

Arishi küm 75 tain Pele-i World Cup 3 tashi nung agizükba medal-tema pound sen 340,000 yong yoka liasü.

Ajisüaka, Brazil teloki 1970 küm Mexico nung 3 buba World Cup takok marok agizükba sülen Pele atema balaka yanglutsüba Jules Rimet takok marokji sen timba yong ayokba osang jangjaogo.

Ano, Pele-i ‘Escape to Victory’ film nung football asayar ka ama shilem agidang asemba tsüngsem pound sen 8,000 yong ayokba osanga jangjaogo.

Tan osettsüset ayokba ajanga aazükba sen shilem ka Brazil nung tentetba tila tanur mozüki tulutiba, Pequeno Principe nem tenla agütsütsü renemba osang ka Pele-ia metetdaktsüogo.

Alima ajunga nung football asayar tajungtiba ta alimai züngshisang, Pele-i 1957 nungi 1971 tashi par Brazil tenüng nung 91 ben asayaba densema, asaya 1,363 tashi nung shilem agidang ajak agi goal 1,281 tashi agüja liasü.