Pema Khandu & Himanta Biswa Sarma nati Ibobi Singh aitsür

Imphal, February 20 (Agencies) : Arunachal Pradesh Chief Minister, Pema Khandu-ia Manipur Congress chief minister Okram Ibobi Singh aitsüogo.
Manipur nung tang rongsenren mokdangba agientsübaji state sorkar indang teinyaktsü lir, ta Pema Khandu-i ashi.
“Mokdangba agientsübaji pa (Ibobi Singh) indang teinyaktsü lir. Ozü state nung yamai mokdang ali ka süra, nibo agiener lila” ta yashi Manipur Assembly atema BJP indang vision document sayaba sülen Arunachal CM-i ashi.
Pema Khandu den külemi, Assam finance minister Himanta Biswa Sarma-ia Ibobi Singh aija jembidang, “mokdang ajanga nübortem timtemba pai (Ibobi) memetet ama yutsür” ta ashi.
“State sorkari onok nem iba tebilemtsü atema mapa inyaktsü nungloktsüra, onoki Centre teyari medeni, ghonda 48 tsüngda mokdang agientettsü” ta Sarma-isa shisem.
Assam nung Sarma dang BJP indang ‘demolition man’ ta ajar aser pa lenisüba kübok BJP-i küm 15 tashi sorkar bena aruba Congress telok atsüngdoka liasü.
Ibobi’er sorkari district tasen tenet tentetba anema United Naga Council (UNC) Manipur nung highway ana mokdang tenzüker Deobarnü tashi nung anogo 121 jungogo. Iba mokdang ajanga Manipur state nung jangotsü, totzü aser tang nüngdakbatem peria mengui timtemer.
“BJP-i vision documents atema kanga bilemtsür. Ozü state nung Congress-i taoba election indang manifesto dang reprang aser kasa onüktem dang enok” ta Sarma-isa ashi.
Ibobi sorkari police constable aniokba maparen nunga ochimashi inyak, ta paisa aitsü.
“Imphal nung ni ajurua jembiba police temi parnok sen lakh 2-3 agi mapa alizük ta kü dang shiogo,” ta paisa ashi.