Pema Khandu-i CPM pur toktsütsü asoshi ajungshi

Agartala, August 9 (Agencies): 2018 Assembly election dak rangloker lisopur vote angutsü mechi nung BJP puri Bodhbarnü CPM pur yimsüsüba mapang taoba küm tsüngda lisopur parnok asem tashi tepsetba anema rally ka ayongzüka agiogo.
Iba rally ya Rabindra Shatabarshiki Bhawan kima agi aser Arunachal Pradesh Chief Minister Pema Khandu-ia iba sentong nung nisung meyirejang aika sentepa aliba matsüngdang o jembi. Pa onük nung pai northeast nung BJP pur ajanga ochimashiba, unemployment aser tanga tebilemtsütem agintsüba indang shisema liasü.
BJP puri scheme balala ajanga teyari agütsüba tenüngsanga jembidang Khandu-i ashiba agi, küm asem tejakdang NDA sorkar kümtetba sülen Northeast pur kanga ajangzüka arudar. Ato Kilonser Narendra Modi-i northeast tesem tem kanga tongtibangsaa repranga arudar koba tanga Ato Kilonsertemi parnok yimsüsüba mapang nung meinyaktet.
“2014 jakdang Northeast state tem nung ochimashi dang ajangshia aruogo, saka Prime Minister’s Act East Policy ajanga nüburtem liba liro nung temaba jenajang kati ajungketogo. BJP pur-i tang Assam, Manipur, Nagaland aser Arunachal Pradesh nung yimsü tesüdak lir aser tang Tripura mapang lir,” ta Khandu-i ashi.
Lisopurtem Left Front sorkar kübok tangutsü tim mongoi toktsüba atema Pai CPM pur aitsü. Left sorkar kübok lisopurtem renloka aoba temaitsü kecha mangur, ta pai ashi.
“Gandhiji-i British nunger yimsüsüba India nung anendaktsütsü asoshi ‘Quit India Movement’ ayongzükba ama tanü BJP puri Marxist yimsüsüba tembangdaktsütsü asoshi ‘Quit CPM movement’ ayongzüker. Ni Tripura nunger talisa lisopurtem dang BJP atema vote asütsü asoshi ajungshir. 2018 küm election sülen BJP puri sorkar kümtetra lisopur jenjang melenshitsü tenangzükba ni agütsür,” ta pai ashi.
BJP state in-charge Sunil Deodhar, BJP tir Biplab Deb nunger ajaki iba sentong nung o jembia liasü.