Pen, Prangpong aser Nübortem

Nagaland nung tang ajuruba tebilemtsü tulutiba asemji, ka pen amer ochimashi mapa tulu inyakba aser aser kaji prangpong amer tashiyim agi sen saruba aser ano kaji item anema ola madokba nübortem asütsü. Aji oda, pen aser prangpong nati bener arutsüba tebilemtsü agi Nagaland tereprangtsü dena mejungi kümogo. Item tebilemtsütem agi matongba aser mekongshiba kibong kata Nagaland nung malitsü. Pen agi ochimashi mapa inyakba agi, talisa, sensaker aser tilartem timtemdaktsür aser prangpong agi, talisa, tulur aser takartem nükenbelemdaktsür. Iba tensa tia ya jungjunga bilemdangra, tanübo asenok ya bendangertemi masü saka asenoksasa asenok kangshir aser timatemer. Item tebilemtsütem nungi asenok jenbua alitsü atema tamasa pen aser prangpong amertemi pen aser prangpongji nübortem anema inyakba oset ka ama masü saka nübortem yariba oset ka ama amshitsüla.Atangji, nübortem asoshi pen-a nüngdak aser prangponga nüngdak, ajisüaka pen aser prangpong na prongla jagi nübortem akoksatsüsa dang inyakra, nübortemia ola adoktsüla. Pen aser prangpong na pronglaji tashi tulu aketba oset, ajisüaka tena tashi dang nungibo nübortem ola kanga agia tashi tuluba lir. Tanü Nagaland merenloktetba kuliji reprangdangra, shitakba nungbo pen agi ochimashi inyakba kija agi masü mesüra prangpong agi tashiyim inyakba kisüng agia masü saka item tamajung aser tim masüba mapatem anema nübortemi ola madokba ajanga merenloktetter ta reprangtettsü. Pen amertem asüyonga, prangpong ameertem asüyonga nisung dang asünungji rongsen nükshir aser meinyaki melamelaa takar kümner. Idangji nübortemi pei temeten aser pei teinyaktsü shilem meteta ola madokra pen aser prangpong amertem asoshi pei inyaknütsü inyaksaktsüsa lenmang sademsadema lapoktsür. Iba jagi parnoka tai menadaktsür aser nübortem jenjanga tamajungba kümadoker.Iba tangatetba nung tanübo Nagaland nung nübortemi pen aser prangpong na pronglaji nübortem ajangzüktsü aser kümzüktsü nükjidong nung amshidaktsütsüsa nübortem tangatetba tama melenshitsüsa kümogo. Pen aser prangpong amertem dang aitsür dang ashi, asenoki jungjunga bilemdangra asen lima mejungi akümba ya nübortem majungba agi alima majung akümba kuli ka sayur. Nübortemia mapa meinyak ser government nungi angati teyari dang imlar. Government meyong ta süra kibur maliba oset amai bilemer anungji mapayur. Iba jagi government meyongbo signboard-a kata shitak azünga mangutsü. Aji oda, mapa meinyak ser chiyonga alitsü merangertemji asenok asünungji, tashiyim agi senotsü sarua asenok taküm alibaji tim mapa ka inyaker amai asenoki bilemer. Iba ama tangatetba asenok dak aliba agi asenoki pen amer ochimashi mapa inyakertem anema ola madokteter aser prangpong amer tashiyim inyakertemjia menokdangtetter. Joko, asen lima nung ochimashi aser tashiyim agi takar küma jangratema alitsü merangbajiang tim mapa ka amato kümadok nungji, pen aser prangpong amertem kar ochishia pei lima aser nübortem tenzükba agi ali rongsen akaba nung pur medemer memenep timtema lira, itemjiang nübortemi menütsür aser takidak makaba lenirtem ama bilemer. Joko asen lima nungbo kaketreju nung dena tanurtem dang kodaser mapa meinyaki pen aser prangpong amshia takar akümtsü ta sayur amato, lanurtem aika nübortem yarir kaka akümtsü melen lokti nem tebilemtsü bener arutsürtemang küma aoba asenoki angur. Iba ama tensa mapang ka nung pen aser prangpong amshia nisung kar takar akümba agi Nagaland mekümzüktettsü. Nagaland asoshi ibai nübortem ajak tenüng amshia nisung kar takar akümtsüba mapang masü saka pen aser prangpong agi Nagaland yanglushitsü aser kümzüktsüsa inyaktsüba mapang lir. Ibai pen aser prangpong tashi kübok nübortem amokmerendakja alitsüba mapang masü saka pen aser prangpongjiang nübortem mulungba nung nübortem ajangzüktsü aser kümzüktsüsa amshitsüba putu mapang lir. Ibaji nübortem dak aket, nübortem koma lidir yamaji pen aser prangpong amertema alitsü.