Pence-i Israel semdanger; Palestine-ibo pa magizüker

Jerusalem, Jan 22 (Agencies) : Palestine nungertemi anema nokdakaka tang US tadong tir, Mike Pence Israel lima nung aruagi lir aser tanü Hombarnü anogo tanabuba nung Israel ato kilonser, Benjamin Netanyahu den ajurutepa ken o kar jembiogo.
Taoba Dec. 6 nung Israel yimtibaji Yirusalem ta agizüker anungji America nunger embassy kasa yimti bushia belener arutsü atema maparen tenzüktsü, ta US Tir, Donald Trump-i nangzüka metetdaktsüba sülen tan ya mezüngbuba US nunger temaba menden nungi tulur kati region semdanger asütsü.
Trump-i Yirusalem yimti indang telemtetba agiba agi jashir tang Palestine nungertemi Pence arubaji jashia bilemer. US tadong tir marudang Palestine Tir, Mahmoud Abbas jibo bendang limai apusoa ogo.
Tang Palestine nungertemi pa aruba magizüker asünung, Pence-i Israel semdangba ajanga linük ana tsüngda yimjung atema jembitsü asoshi teimla kecha mali.
Hombar aonung Israel parliament nung Pence-i jembitsü sentong rema liasü saka idakji Arab nungi züngsem shinga madentsü ta metetdaktsüogo.