Pensioner account nungi sen auyazüka agiba atema nisung ana apu

Chiteni/July 11, 2020 (Agencies): Manipur nung pensioner ka indang bank account nungi ashikülak mapa amshia sen auyazüka agiba atema, Thoubal District police indang team kati nisung ana pua liasü, ta police sangdong ka ajanga metetdaktsü.
Iba lendong ya Hokolbarnü ataloka liasü.
Pensioner bank account nungi sen auyazüka agir nisung ana ya Lilong Tamyai nungi Feroz Khan aser powerhouse anasa Lilong Usokpokpi Makha nungi Hamidul Rahman ta jangjaogo.
Thoubal district kübok Khangabok Part II Mayai Leikai nungi arishi küm 63 tain Ningthoujam Biramangol Singh-i ashishiba nung ajemdaker sen auyazüka agir nisung ana anema ken o benokogo.
Singh-i ashiba agi, pa indang ATM card ya ashikülaker temi block ser aliba ATM card ka den melenteptsü aser pa indang account nungi sen lakh 6.5 auyazüka agitsü atema ATM card ya amshia liasü.
Police-i bushisüngdangba mapang, pua alir nisung ana yagi Wangjing kübok ATM booth ka nung block ser aliba card ka angu aser tenati iba card ya Singh indang card den melentepa liasü, ta metetdaktsü.
Singh-i ATM booth nung sen agizükba mapang, pa indang ATM PIN no. ya tenati meima repranga ata, ta sangdong nung shia lir.
Thoubal nung Deputy Commissioner indang office tejakdang aliba ATM booth nung sen agizüktsü atema pensioner Singh booth telung jagi yir aliba mapang pua alir nisung ana yagi pa yaritsü atemer tenati bena aliba card tejen ya Singh indang card den melentepja liasü, ta Police sangdong ajanga metetdaktsü.
Taoba anogo 32 tashi nung pua alir ana yagi Singh indang ATM card amshia sen 6,40,000 agizükadoker liasü, kong Kakching, Yairipok, Imphal aser tanga tesem ATM booth balala nungi anogoshia sen 20,000 agizük, ta kasa sangdong nung shia lir.
Tenati (pua alir) iba card ya petrol pump balala nung amshi aser iba mapang sen 28, 370 tashi indoker liasü, ta Police-i shisem.
Police-i ashiba agi, Singh indang bank account nungi nisung ana yagi sen 6,68,370 tashi auyazükadoker liasü.
Tenati auyazüka agiba senji bushitsü atema district police-i bushisüngdangdar,” ta Police-i shisem.
Iba maparen dak sendakba nung jenjang tapet agia temerenshi agütsütsü atema, pua alir nisung ana ya court-i anir oa obendang agütsütsü.