People’s Choice Awards atema Priyanka Chopra züngsemer

New Delhi, October 14 (Agencies): People’s Choice Awards nung Priyanka Chopra ‘Favourite Actress in a New TV Series’ shilem nung tenüng züngsemogo.

Lai America TV sentong Quantico nung shilem agiba nung ajemdaker iba sempet atema la tenünga shim.

Hollywood nung kümshia People’s Choice Awards agir aser iba sentong nung taoba küm film, TV show aser kentener tajungtem nem nübortemi vote agüja shimer.

Taküm November 3 nü telemsa balala nung tematiba jenjang nung nisung pongungu tenüng metetdaktsütsü.

Iba tetoktepba atema peopleschoice.com, Facebook aser Twitter nung voting tenzükogo aser iba ya October 22 nü tembangtsü.

Takok angurtem tenüng January 6, 2016 nü sangdongtsü.

Quantico nung India tsür Priyanka-i Alex Parrish ta ser FBI recruit ka ama shilem agir. Iba sentong ya 9/11 sülen America nunger litsü nung kiralongrartemi tamajungtiba amaktsü asoshi tasa yangluba otsü nung ajemdaker yangluba lir.

“Quantico nung shilem agirtem rongnung tashitaitibaji Chopra lir. La ya Bollywood superstar aser taoba Miss World lir” ta New York Times review ajanga metetdaktsü.

Iba TV sentong nung Priyanka den Jake McLaughlin, Aunjanue Ellis, Yasmine Al Masri, Johanna Braddy, Tate Ellington, Graham Rogers, Anabelle Acosta aser Josh Hopkins nungertemia tongti shilemtem agir.