PepsiCo-i chiyungtsü nung shini, metsü aser temo ajema inoktsü

New York, October 17 (Agencies) : Alima nung chiyungtsü aser tajemtsü tapu balala yangluba company tulutiba rongnung ka ta züngshiba PepsiCo-i tang alima nung temang atema nüngdakba angateta parnoki yangluba chiyungtsü balala nung shini, metsü aser temo ajema inoktsü ta Hombarnü metetdaktsüogo.
India Ato Kilonsor Narendra Modi aser Food Processing Minister Harsimrat Kaur Badal naprongi PepsiCo dang parnoki yangluba chiyungtsü aser tajemtsütem nung shini dang nungi süngjang tzü timba inoka temang asoshi junga yangluang ta shiyonga arua liasü.
“World Health Organization-i lateta yutsüba chiyungtsü yangluyim nung ajemdaker nüburtem nüngdakba atalokja PepsiCo-ia parnoki yangluba chiyungtsütem nung shini, saturated fat aser sodium ajemtsü,” ta PepsiCo-i sangdong ka ajanga metetdaktsü.
“Tanü alima kanga kara melenshiba tensa ka nung company temi inyakyim asem kanga junga inyaktsüla: rongsenkettsüng nung tashi ita alitsüla, mapang talangka tim mademtsüsa sen akatsüla aser lokti-i nüngdakba ama inyaktsüla,” ta PepsiCo nung mendenbuba aser CEO Indra Nooyi-i ashi.
“PepsiCo-i ano tebilemba aika metongteti lir. Onok nükjidong tasentemji onoki koba tashi ka inyakteter iba nungji ajemdaker ulushitsü,” ta lai ashi.
2025 tashi onoki onok teinyaktsütem lateta yua lir. Item rongnungji calorie shia metsü milligrams 1.3 dak tali meinoktsü aser Everyday Nutrition chiyungtsütem, tang dang nungi timba ayoktsü tebilemba densema lir.
Modi-i mapang talangka nungi tajemtsü balala nung süngjang nungi agizükba tzü peria inoktsü jembia arur. Taküm January ita nung pai item tajemtsü pongdang shia nung tajemba agi süngjang nungi agizükba tzü noklang nung shilem anabosa inoktsü ashi. Yamaji inyakba ajanga aluyimertema pei lu nungi adokba süngjang ayoktsü atema market tasen ka angutsü ta Ato Kilonseri ashi.
Business atema United Nations Guiding Principles aser meimchir temeden dak ajemdaker PepsiCo-i meimchir temeden akhümtsübua inyakyimtsü, ta company sangdong nungsa shia lir.