Peren DC-i Arms License atema metetdaktsür

Dimapur, Aenjeti 18 (TYO): Ministry of Home ajanga National Database of Arms License (NDAL) tenzükogo, aser ibaji tang mapa küma inyakba mapang lir, ta Deputy Commissioner, Peren, Smita Sarangi, IAS-i Peren district nung Arms License kiburtem dang metetdaktsü. NDAL ya arms license indang online web category ka lir aser license agütsüba aser renew asüba shia online ajanga arms license indang data ya online ajanga agütsütsüla. Iba sülen system ajanga license amshir shia atema Unique Identification Number (UIN) kaka agütsütsü, koba office record atema license nung inoka ayutsü. Iba maparen tembangtsü aser license amshirtem nem timtem magütsütsü mechi iba mapa inyaktsü atema tatem anogo ya Metsüremi (March) 31, 2018 tashi atsülangtsüogo, ta DC, Peren ajanga sangdong ka nung metetdaktsü.
Anungji iba district nung arms license amshir aser iba district kübok züluoka aliba arms license kiburtem dang tsünglanglen agüja aliba totuyuba ama inyaktsü metetdaktsü.
1. Arms license amshirtem renew masü alirtem ajungai agüja aliba tatem anogo matongdangsa license renew aser update asütsü metetdaktsü.
2. Arms license renew süaka ‘sticker paste’ atema magütsüi alirtem dang iba maparen atema office nung license bener arua agütsütsü metetdaktsü.
3. Arms license amshirtem shirnoki office nung license agütsür tabeni maru ali, parnok ajak dang license kibur indang passport ana bener arua iba license aser ‘sticker’ agizüktsü metetdaktsü.
Temalen agüja aliba totuyuba sülen manidaker atema tatem anogo süyir District Administration ajanga ashishiba aser mangatettep kicha magizüktsü aser NDAL nung aliba ama license ya invalid kümtsütsü, ta kasa sangdong ajangasa metetdaktsü.